筆是機場｜惡有惡報　走到終局的蘋果日報

文/稀思路

壹傳媒、《蘋果日報》創辦人黎智英違反香港國安法被判監20年，各界都認為正義雖然遲到，但始終沒有缺席。黎智英被重判，反映在港嘅主要黑暴勢力已經受到懲治，而近日《蘋果日報》等喺公司登記冊被剔除，更反映《蘋果日報》亂港時代已經完全告終。回想過去20年，由黃色新聞、反政府、支持「佔中」到黑暴運動，《蘋果日報》一直將壞風氣帶入香港，當佢被剔除公司註冊，甚至成為「受禁組織」，自然亦係佢哋嘅應得結果。

署理行政長官會同行政會議根據《香港國安法》第31條及《公司（清盤及雜項條文）條例》（第32章）（下稱《條例》）第360C（1）條，命令公司註冊處處長將蘋果日報有限公司、蘋果日報印刷有限公司及蘋果互聯網有限公司自公司登記冊中剔除。公司註冊處處長隨即將《蘋果日報》相關三間公司自公司登記冊中剔除。除此之外，三間公司亦被列為「受禁組織」，任何人從事《維護國家安全條例》第62至65條所訂明行為，即屬犯罪，包括以「受禁組織」的幹事或成員身份行事等。

有傳媒報道，警方日前就採取行動，封鎖《蘋果日報》位於將軍澳工業邨嘅大樓，現場所見，有大批警員喺大樓嘅三個出入口駐守，並拉起封鎖線。政府就指出，黎智英同《蘋果》三間相關公司被控共三項危害國家安全罪行，被法庭裁定全部控罪罪名成立，並於今年2月9日判刑，當中《蘋果日報》相關三間公司各被判罰款3,004,500港元。

筆者從小就開始睇唔同傳媒嘅報道，《蘋果日報》開始畀人感覺就係「黃」，但唔係非法「佔中」時黃絲嗰種「黃」，而係「黃色」（色情）嗰種「黃」，黎智英搞《蘋果日報》，之所以一開始就搶到部分市場，除咗打價格戰外，係因為佢將一種「黃色小報」嘅風格狠狠地帶入報界，所以亦出現咗「畀錢受訪者召妓」等新聞，喺政治以外，《蘋果日報》首先就為香港傳媒帶來極壞作風。

之後，《蘋果日報》涉及政治嘅步伐越踩越深，非法「佔中」前，其實已經有反國教等報道，非法「佔中」可以話係黎智英「第一次」親自行出嚟參與違法行動，之後到2019年，唔需要筆者講咩事，讀者們都好清楚。每當有遊行、衝突，《蘋果日報》總係旗幟鮮明地支持暴徒、反對政府，事情一直推演，黎智英就索性「盡地一反」，直接要求外國勢力干預香港特區嘅事務，甚至請求外國制裁。

凡事有因有果，黎智英以至《蘋果日報》三間公司走到今日，完全係咎由自取，如果《蘋果日報》單純聲色犬馬，唔會落得今日下場；又或者，如果黎智英、《蘋果日報》有反政府傾向，但仍然守住法律底線，黎智英、一班高層同《蘋果日報》都可能有好少少嘅結局。黑暴運動期間，咁多後生仔因為受到煽動而違法，煽動佢哋抗爭嘅人同媒體，都應該受到懲罰。筆者覺得，雖然黎智英已經被重判，而《蘋果日報》亦告解散，但社會仍然有「軟對抗」風氣，各界要謹慎應對，慎防再出現影響社會穩定同國家安全嘅亂象。