疑黃牛黨阿婆強行打尖　搶籌推保安指罵警員

【點新聞報道】海港城日前發生MMA事件，有網民於社交平台上載影片，顯示潮牌Supreme 聯乘MM6（Supreme × MM6）發售日，一班疑似「黃牛黨」阿婆強行打尖，被保安要求離開，仍賴死唔走，還搶籌推撞保安，並指罵警員。影片引來網民熱議，「mm6變mma」、「好心就專業啲，早啲去排唔好玩打尖，咁難睇」。

有網民日前於社交平台threads上載影片，指「今日（3月21日）Supreme x mm6 發售日，海港城門口大癲」。樓主指，當時有疑似「黃牛黨」阿婆打尖，還搶籌推撞保安，指罵警員，「一堆黃牛阿婆強行打尖，啲保安叫佢哋離開，佢哋死都要賴喺度唔走，跟住搶飛，之後推保安鬧警察」。

從影片可見，現場有1名女子想插入排隊隊伍，但被保安攔截，有女聲高呼「唔好郁手」。其間有多名婆婆趁亂走入排隊隊伍，有正在排隊的男子用手擋隔，並質問「做咩啊你哋？」，又說「唔好打尖啦，差佬都嚟咗喇」。鏡頭一轉，一名穿背心婆婆指責1名女保安「你推我！」，女保安則回應「你推我咋喎，阿姐」。

影片引起網民熱議，不少人批評婆婆的行為離譜，「mm6變mma」、「受人錢財，好心就專業啲，早啲去排唔好玩打尖，咁難睇」、「只係以為自己係搵食就理直氣壯，乜都做得出」、「成班一哭二鬧三上吊，孫子兵法都用埋」。有網民則提供建議「其實最好就網上實名抽籤，每款限買一件，抽中仲要限日子時間去買，no show就抽下一個」。