筆是機場｜堅實盟友拒絕支持　美國打仗越打越衰

文/稀思路

美國、以色列襲擊伊朗，戰事已經持續咗差唔多三星期，本來，美、以想用斬首行動，迫使伊朗迅速投降；不過，頑強嘅伊朗唔止絕地反擊，仲封鎖埋霍爾木茲海峽，令美國大失預算，戰事亦陷入膠着。美國總統特朗普想北約參與霍爾木茲海峽護航，但遭到盟友們一一拒絕，講真，呢場戰爭由美國肆意發起，想盟友同佢一齊埋單，又真係唔啱數嘅！

早前，特朗普要求北約盟友參與霍爾木茲海峽護航，不過英國、法國同德國已經拒絕，英國表示自己唔會捲入更大規模戰事，暗示不會考慮派兵到海灣國家一帶。德國雖然曾表態支持空襲伊朗，不過日前都閂埋個後門，話北約係防守聯盟，唔係「干預聯盟」。德國國防部長Boris Pistorius仲補充，意思指「不是德國的戰事，不是由德國發起」。

英法德以至北約，佢哋都可能因為霍爾木茲海峽封閉而受到影響，但涉及派兵，當中就有兩大問題，首先係場仗由美國、以色列發起，點解要北約國家同美國一齊癲呢？一個更加深刻嘅問題係，派兵到戰區涉及人命，特朗普聽以色列講去打仗，要英國、德國等國家一齊派人去冒險，不值得吧！

美國盟友嘅反應，其實就係唔支持美、以貿然發動戰爭，依家戰事開始拖長，盟友就更加係「多謝」美國。從盟友們對戰事嘅反應，仲可以側面睇到一個事實，就係美國號召力大不如前，「老大哥」發動戰爭，其他盟友就算hea，都應該表態支持加做少少嘢，依家一個二個盟友咁快閂閘，一副事不關己嘅姿態，全世界得美國、以色列仲堅持襲擊伊朗，兩個國家有可能單以空襲取勝咩？

呢個世界好得意，好多嘢到最後都係此消彼長嘅遊戲，當美國越來越不可信，中國就越來越受信賴。據一個由美國「政治新聞網」同英國民調機構Public First喺15日發布嘅民調顯示，喺英國、法國、德國同加拿大四個國家當中，大批民眾因為美國政府嘅外交政策而對美國態度轉冷，而相較對美國，中國更值得信賴。有受訪者認為，「他們可能減少對美國的依賴，但較難減少對中國的依賴。」

有關民調同報道嘅中心思想，除咗係美國開始被摒棄之外，現時全球力量嘅平衡正在改變，唔再以美國為主導，甚至唔再以西方為主導。筆者之前睇過一種分析，話美國今次攻打伊朗係孤注一擲，想借戰爭保住霸權地位；不過呢一戰，可能亦係美國跌落神壇，從此衰落嘅一次不道德戰爭。