天水圍餐廳「天降巨鼠」 店員淡定一招制服
【點新聞報道】近日網上瘋傳一段影片，有食客於天水圍新北江一間餐廳用餐時遇天降巨型老鼠事件，嚇得當場食客四處走避，最終店員用老鼠膠制服巨鼠，影片掀起熱議。
網上流傳影片顯示，一隻約有手掌般大且身體肥碩的巨鼠趴在餐桌上緩慢地挪動，附近食客見狀紛紛退後躲避。只見一女店員淡定拿着老鼠膠朝巨鼠方向拍過去，剎那間巨鼠也劇烈的反抗了一下，拍攝者驚呼「嘩，離晒譜！」。
影片引起網上熱議，不少網民直指，「新北江本身就係老鼠場，每晚9點打後啲老鼠經假天花全面進場。食肆的嘢食一定好多俾老鼠咬過。利申，喺嗰度返過一年工」、「呢個商場，又賣生果，又有菜，連豬肉都有，成個街市咁，冇老鼠就難啦。餐廳都慘，商場管理不善，老鼠周圍走」、「成個商場嘅天花都通，即使係唔通，夜晚成個商場都係，只係你見唔到」。
亦有網民則猜測，「係咪食咗老鼠藥？唔識走嘅，正常爬勁快」、「其實未必關舖頭衞生事（不過睇片舖頭入面同職員處理手法都唔多乾淨），隻老鼠食咗老鼠藥，渾渾噩噩去搵水飲，行到呢個天花跌咗落嚟」、「一定有做滅鼠，就咁睇隻老鼠應該係食咗藥。不過真係好L唔好彩跌咗落嚟，咁就玩完」。
有網民則調侃，「呢個主題樂園用嚟招呼自遊行旅客夠晒噱頭，迪士尼嗰隻係人扮嘅冇乜特別」、「同枱食飯，各自修行」、「加多雙筷子」、「搭枱都唔得咩！又話叫留港消費」、「即升級變迪士尼樂園餐廳，有米奇陪你玩」。
