移民講人系列｜遭吸毒鄰居騷擾爆衝突　移英男啞忍怕入不到籍 　同路人揶揄「唔恰你恰邊個」

【點新聞報道】正所謂「人離鄉賤」，有移民英國的港男，畀人恰都上心口都唔出聲，為嘅就係怕影響入籍喎。移英男在網上發文話自己被吸毒的鄰居騷擾，仲發生肢體衝撞，點知警察問佢想唔想告上庭時，佢即時縮沙話擔心會被誣告、反咬影響入籍。不少網民都留言揶揄「唔恰你恰邊個」、「畀人蝦到上心口都唔出聲，小心佢變本加厲」、「你唔告，人地反告你，你就PK」。

該名移英港男在fb專頁「英國香港人生活交流區」發文圍爐訴苦，話自己被吸毒的鄰居騷擾，「我英國後生仔鄰居之前持續食大麻同埋言語騷擾兇我鬧我，早兩日仲發生肢體衝撞（佢不斷接近而且有攻擊意圖。我淨係用手撐開住保持距離）」。

之但係警察到場後，樓主就變咗鵪鶉，「而家警察問我想唔想告佢上庭處理，唔係嘅話就剩係得口頭警告（之前已經警告過幾次），我想問被咁樣會唔會影響我入國籍。」他解釋是擔心會被對方反咬，「我驚隔籬嗰條友癲癲地，陣間話我都鬧佢或者屈我郁佢」。

不少網民都勸樓主告到底，「告人都會影響入籍? 咁係咪畀人爆格我哋都唔出得聲」、「你唔告，人地反告你，你就PK」、「難得警方肯做嘢，即係有晒理據梗係告佢啦。畀人蝦到上心口都唔出聲，小心佢變本加厲」、「你玩大啲去GP擺心理報告，唔係你同佢話係就係，你有明確證據佢有隊草咪告」。

不過，亦有網民認為多一事不如少一事，盡快搬走才是上策，「唔好理租定買即刻搬」、「我建議你搬走，無謂同佢有爭拗，做個開心快活人」、「我比較悲觀，寄人籬下，唔好搞咁多嘢，local /難民衝燈唔怕、超速唔怕、打官司上訴唔怕、0元購唔怕，你敢唔敢?」、「問得出呢個問題，你應該都係怕事嘅一類。不如早啲搬走，買佢怕啦。」

有網民就擔心樓主人身安全，「佢都食得大麻，精神狀態出現異常，唔知會對你做乜」、「小心行事，佢癲仲住你隔離，你出入仲唔安全，警察唔會日日理你，可以搬就最好」、「呢啲事有可能再發生，未裝Cam就快喲安裝返，有乜事都有證有據。盡量同佢保持距離，邊個郁手先就蝕抵先。如果佢郁手先就唔同講法，你可以自衞。」

另有網民指訴諸法律有風險，「肢體衝突。可能會互告」、「你用手推開個動作都有機會被告Common Assault（普通襲擊），最後可能無事，但麻煩咗一輪」、「而家最大個重點就係如果你係準備入籍，有法庭case，就要申報。究竟有冇影響? 我諗冇人會答到你，你自己衡量吓個風險。當呢度好多人同你講，話而家你係受害者喎怕咩。咁到時真係有影響力，你覺得呢班人到時可以幫到你咩，咪又係食花生。」