筆是機場｜全球爆發反美示威　特朗普內外交困

文/稀思路

美國、以色列聯手，突襲伊朗之餘，仲不合法地謀殺伊朗最高領袖哈梅內伊，引發中東甚至全球動盪。表面上，美、以聯軍「節節勝利」，因為論空戰，美、以有絕對能力碾壓伊朗；不過伊朗都唔係省油的燈，敢於對抗美國，甚至敢於同美國、以色列打持久戰。其實美伊衝突，戰場唔止係伊朗或中東，而係整個世界，美國要戰勝伊朗，除咗要將伊朗「打到投降」，仲有一個重要因素，就係確保唔會因壓力而退兵。綜合依家世界局勢，似乎美國國內、國外，反戰聲音清晰，戰事每拖多一日，美國總統特朗普就會多一分壓力。

據報道，美國民間團體「阻止戰爭並終止種族歧視組織」聯同多個自由派團體，日前（3月7日）就喺美國發起反對美以襲擊伊朗嘅示威，喺紐約，示威者就高舉黃色反戰標語同諷刺特朗普同內塔尼亞胡嘅圖像，而反戰嘅猶太團體，都有到場聲援。喺英國，亦有多個反戰團體喺倫敦舉行大規模示威，抗議美、以轟炸伊朗，並呼籲盡快停止軍事行動。另外，喺加拿大等地方一樣出現反戰示威，劍指美國同以色列政府。

雖然都有人支持特朗普，但其實世界各地嘅普遍共識，都係認為美國、以色列貿然興兵，根本就係殘殺別國領袖同人民，所發起嘅係不公義、不合法戰爭。有一點，可能讀者以至其他人比較少留意到，就係美國同以色列今次發動戰爭，其實並無得到全部盟友嘅支持，甚至有盟友公開批評美國嘅戰爭行為。

例如法國，總統馬克龍就公開批評美國同以色列嘅軍事打擊違反國際法，雖然馬克龍講得比較「有技巧」，將當前中東問題歸因於伊朗，但佢對美國嘅批評，仍會令美國感到尷尬，因為傳統上，歐盟包括法國，本身就係美國嘅鐵桿盟友。至於西班牙，更加係明顯唔支持美國嘅軍事行動，拒絕借出軍事基地支援美國對伊朗嘅軍事打擊，即使美國宣稱要切斷同西班牙嘅貿易往來，似乎西班牙都冇退縮，最後係西班牙退縮，定係特朗普又「縮」，真係好難講。

其實曾一度拒絕借出基地嘅，仲有同美國關係深厚嘅英國，除咗西班牙、英國以外，其他歐洲或歐盟國家，雖然冇好大力反對美國，但談及到中東局勢時，有部分都係模糊其詞。一個比較概括嘅睇法，就係特朗普堅持出兵，冇國內國會嘅授權，喺國內先面臨極大嘅反對聲音；去到國際舞台，即使係過往嘅盟友，部分都唔太願意支持美國，當國內國外都唔傾向支持美國嘅非法戰爭，特朗普明顯就係內外交困。

美國出兵，通常開頭一定係威係勢，但如果戰事一拖落去，美國就會變得尷尬甚至陷於劣勢，點解？因為如果空襲唔能夠令敵國投降，美國軍人、資源「矜貴」，陸續有美國軍人陣亡，國內反對聲音就會愈大，到時特朗普就會好尷尬。假若，戰事拖到幾個月甚至更長時間，對特朗普更為致命嘅地方，就係臨近中期選舉，特朗普嘅侵略行為，可能會拖累到成個共和黨。所以依家，伊朗唔係同美國硬碰硬，而係只要守得住，特朗普就會有大麻煩。

喺網上，美國國內唔少政客都批評特朗普出兵，筆者睇過一個有趣說法，就係以色列一直想攻打伊朗，甚至拉美國落水，多年來，都冇美國總統願意直接出兵，就只有特朗普，愚蠢地聽從以色列要求。所以喺美國國內，亦有一種說法，話美國軍人、公民唔應該為以色列而戰死。從公開資料可見，委內瑞拉、伊朗成為特朗普「逐個擊破」嘅目標，但每一次出兵，反彈力就愈大，下一個「被擊破」嘅，有可能係特朗普本人。過去美國嘅軍事行動，虎頭蛇尾嘅，其實不在少數！