方力申紅館騷海報「撞衫」尹光 自爆粉紅控化解風波
【點新聞報道】「全民運動挑戰日」今日（3月1日）於屯門市廣場舉行，並正式挑戰健力士世界紀錄™️「最多人線上線下同時做開合跳」。是次活動邀請方力申擔任星級大使。
方力申與全場參賽者一同參與開合跳衝擊健力士世界紀錄，更事前做足準備，小方笑道：「今朝我都有做運動，行咗30層樓梯，好在今日天氣唔係太熱，大家好順利一次過完成呢個慈善紀錄。」
小方日前宣布5月首踏紅館舉行個人演唱會，海報一出即時成為話題焦點，一身粉紅搶眼打扮的小方，被指與尹光於2023年的演唱會海報造型撞到正，他說：「我要負上所有責任，因為全部都係我決定，我真係好鍾意粉紅色，十幾歲破香港紀錄有戴粉紅色泳帽，我着嘅內褲都有粉紅色，仲有我本身又生女呢！粉紅色襯粉藍色真係好靚，點知同光哥撞到一模一樣！（考慮順勢邀請尹光擔任嘉賓嗎？）平時有同光哥一齊打乒乓波，我哋係好兄弟，光哥同我講會全力支持我！」
尚有兩個多月時間，小方已在全速籌備，並進行魔鬼特訓，他說：「香港人要求高，又要放煙花又要剝衫，我要為剝衫做好準備！但最大需要克服嘅就係我個女，返屋企見到佢就乜都唔想做，淨係望住佢、抱住佢、同佢傾偈，點樣可以兼顧老公、爸爸，仲可以操fit自己？真係最大嘅困難！」
方力申坦言成為父親後，對「榜樣」二字有更深體會：「以前做運動，我會諗點樣突破自己。而家我會諗，我做的選擇會唔會影響屋企人。小朋友未必聽你講道理，但一定會睇你點做。」他直言，健康已經不再只屬於個人目標，而是家庭責任的一部分。
方力申更言照顧女兒本身已是一項高強度的體力訓練，「成日抱住女兒走來走去，其實都幾考驗體力。」他形容與太太輪流照顧女兒的過程，猶如一場不斷交棒的接力賽，「大家分工合作，有時我接手，有時佢接力，默契好重要。」他笑稱兩人這個「混雙組合」尚算合拍，「湊女同做運動幾似，都講求體力、耐性同配合。」
不少網民指女兒樣貌似足爸爸，被問到會否期望她將來繼承衣鉢成為運動員，他笑言未有刻意為女兒規劃未來方向，但健康一定會放在第一位。
（點新聞特約記者陳惠芳報道）
