筆是機場｜馬年「馬上走」　英國又出現回流潮

文/稀思路

馬代表活力、韌力同走動，踏入馬年，筆者喺網上睇到篇文章，話英國等地方出現「逆移民潮」，根據最新調查，如果英國落實移民政策加辣，受訪嘅BNO「5+1」港人移民，會有12.8%回流香港，人數超過2萬人。BBC同一啲港媒最近亦訪問咗「回流者」，佢哋靜靜雞由英國返香港，估計最終回流人數會喺2萬人之上。其實，英國政府雖然「扮有義務」，但根本「冇義務」要無條件接收港人，浪費咗錢同時間而回流嘅香港人，只能當發咗一場夢（惡夢）。

根據文章，幾個港人組織訪問咗超過1700個BNO「5+1」港人移民，問佢哋如果攞唔到永居，會去邊？有27.6%受訪者表示會離開英國，12.8%回流香港，另外就有近15%嘅受訪者話移民去其他國家。以已經抵達英國嘅港人有超過17萬人計算，回流者大約就有21000人。

不過，想移民去其他地方，可能都唔係咁容易，以加拿大為例，其實已經開始收緊移民政策，要搵到移居之地，相當不容易，之前筆者睇過新聞，加拿大嘅移民定居申請，輪候時間可能由12個月至600個月不等，600個月係咩概念？600除以12，即係可能要等50年。其實，當西方國家暫時仲係熱門移民地點時，去咗英國嘅人想去加拿大，但可能加拿大都full full地喇。

有接受訪問嘅移英港人就指，自己本身喺香港做的士司機，但住喺英國期間長期抑鬱，仲諗過自殺，好似跌咗入深淵咁；起初以為一段日子就可以拿到英籍，但一直苦等，十分痛苦，加上佢喺英國做嘢嘅地方受到暴力衝擊，但警方一年之後都拉唔到人，感覺英國法治、人權等期望都落空，所以決意回流。

從報道、從回流港人，其實最少可以睇到兩個實況，第一係英國如果收緊移民政策，客觀效果就係叫大部分移英港人「返香港」，例如退休嘅移民人士，唔通你叫佢哋搵返工，再等夠時間先申請永居？本身英文唔好嘅人，如果要操好英文再去考試，可能要用上幾年甚至更長時間，點玩？

被傳媒訪問嘅回流人士，亦揭示咗英國嘅殘酷現況，治安差，人權差，越住越抑鬱。相關文章都有轉述其他人嘅訪問，英國嘅問題仲包括生活成本、入息稅都高，試過搵工時半年內申請100個職位，都冇一次成功；喺沉重嘅生活壓力之下，有人唯有放棄移英，回歸香港。

近日，財政司司長陳茂波發表咗2026-27年度財政預算案，睇下香港現況，財政恢復盈餘，經濟增長合理，股市交投暢旺，IPO又重奪全球第一；同英國包括倫敦相比，似乎移居英國嘅人，選擇咗離開好地方香港，而去咗經濟、治安、社會環境都差嘅英國。如果相關資料係正確，依家仲有十幾萬移英港人喺英國，而英國政府又話會放寬資格畀香港後生一代可以申請移英，老老實實，係咪又係陷阱？呃完香港人一次都算，仲想呃多次？