移民講人系列｜移英港人英文考試肥佬出帖訴血淚史 網民：祝你學業進步唔好回流

【點新聞報道】唔少港人英文都唔識就跟風移民，完全沒認真諗下「自己係乜嘢新絲蘿蔔皮」，憑什麼可以過到英語能力考試攞永居。近日有移英港人在網上發文大呻英文考試肥佬，話自己當時太緊張、心跳好快、口震、腦亂晒、手心出汗喎。又話若果BNO移民政策落實B2英語水平，就打定輸數：「對唔住都講句！準備另一個新嘅旅程」。

該名移英港人在fb群組「英國香港人生活交流區」發文分享英語能力考試的經歷，話準備咗好耐，最後結果係肥佬，覺得好唔開心。他憶述，「入到考場嗰刻，其實我已經知道自己太緊張、心跳好快、口震、腦亂晒、手心出汗！」，但他都盡力表現自己「見到個官，我都搶住講 how are you，可能個人比較心急，好想合格！好想表現自己，最後講多錯多！唉」。

樓主收到「肥佬」的結果後，當堂眼濕濕，「我諗住本身都係攞到CC/CD分數合格就算要求唔好咁高，無奈成晚都瞓唔着，等到凌晨4:30收到電郵...答案 DD不合格！真係有啲眼濕濕，喊出嚟。」

樓主自覺付出與收穫不成正比，「我唔係冇努力。呢段時間真係捱夜溫書、睇片、練講。但現實係，有時就算你已經盡咗力，結果都未必如你所願。」他坦言今次失敗好難受，但為咗屋企，為咗自己，會再試一次。

不過，英國政府擬收緊移民政策，落實B2英語水平。樓主頓感壓力倍增，仲搞到個人有焦慮症，憤憤不平地指，「我知道好多人英文一定係好，但係其實有部份唔少香港人或者比較上咗年紀，好努力、好努力生存掙扎喺英國！」最後，樓主亦打定輸數話「如果真係實行B2，對唔住都講句！準備另一個新嘅旅程」。