廟外解籤被劏水魚索價逾6000蚊　港男發警世文嘆「當畀咗智商稅」

【點新聞報道】新年期間，不少人都會前往廟宇拜神求籤，為求得能在新的一年裏順利平安、得到神明的庇佑和祝福，日前有港男於網上分享在廟外解籤被當水魚的經歷，呼籲他人以此為鑒。

港男於Threads發文，大呻「今日去解籤，劏咗我六千幾蚊，明明上年$50一支籤only。風水佬果然都係劏字派」。港男稱，當時在廟外解籤的陳師傅「佢係無啦啦話要作福，話女朋友運勢差，我個陣係太shocked，但又避唔開」。由於當下事主與其女友不懂反應、沒有拒絕，最終被收取逾6000元解籤費。後續，樓主無奈直言，「我出Post都係自抽（水）同警世下。大家要解籤嘅就入面搵人解啦，就算聽到咁貴唔好學我企唔硬。今次當畀咗智商稅」。

帖文迅速引起熱議，不少網民都感到十分震驚，「六千幾蚊轉頭走啦，擺到明詐騙喎」、「舊年都好似係$20一支咋喎」、「點解宜家車公啲解籤佬變成咁，以前真係老實，解籤個價係實價」、「喺神面前做缺德嘅事，佢都幾大膽」、「$6000你可以sub幾個月ChatGPT都得」、「6000幾蚊開盤睇流年，睇埋你屋個風水都仲得」、「攞一半捐去公益金可保你全年大吉，總好過畀風水佬」、「你支已經係上籤，點解仲要去聽人講呢？不過破財當擋災啦，經一事長一智，嚟緊一定會好嘅」。有網民則質疑，「呃人唔出奇，你肯畀就真係奇」、「佢揸住支槍要你過數嗎」、「無問清楚收幾多就搵人解，又肯畀錢嘅呻都無謂啦」。

另有網民好奇發問，「畀啲貼士係邊位師傅？係咪有啲名氣個間？因為近排睇到好多post都係講緊佢劏咗人幾千蚊，有個女仔知道解籤明明幾十蚊，最後無啦啦話收佢幾千，個女仔企硬先劏佢唔到」，「你去做咗法事呀？」