（有片）海味舖吃開年飯延續傳統菜單　老闆冀做好本分吸引年輕消費者

【點新聞報道】大年初二（18日）「開年」，於1965年開業、扎根上環海味街61年的家族式經營海味舖「裕隆號」，今年秉承數十年如一日的傳統，於店內與親友及員工一同吃開年飯。店舖遵照傳統查閱風水通勝，擇定上午11時吉時拜神，員工從早上9時多便開始備菜、切料、炒餸及斬雞，忙碌地準備這頓年度盛宴。

踏入正午12時，吳偉鴻及妹妹吳蕙玲，與家人及主圍12名員工共同舉杯，齊齊起筷。今年的開年飯一如既往地豐盛，延續了「八餸一湯」的傳統菜單，包括寓意喜氣洋洋的乳豬、象徵「發財好市」的髮菜蠔豉、傳統齋菜、切雞，以及寓意「撈起」、風生水起的炒旬蝦等。吳蕙玲表示，這份菜單由父輩一代代傳承下來，形容是「50年不變」。

老闆：大環境消費弱 市民「想買但唔捨得食」

儘管傳統依舊，但面對經濟環境的變化，老闆吳偉鴻在接受訪問時，感嘆市道不景，市民消費力減弱。吳偉鴻表示：「大家想買但唔捨得食，總之佢哋買量少咗，即係以前買廿斤，之後買嗰啲真係好失望囉。」

吳偉鴻感嘆，現代家庭較少年輕人會親自下廚做這些傳統菜式。「嗰啲後生嘅第一冇時間去整，佢買嗰啲嘢唔識整，同埋唔識揀嗰啲」。被問及用何對策應對銷情欠佳，吳偉鴻表示只能做好本分：「做好啲囉，做好啲囉，然後再買返啲精啲嘅嘢、好啲嘅嘢囉，吸引返啲後生嗰啲囉可能。」

對於新一年的期望，他態度審慎，希望經濟能慢慢復甦：「希望好似十幾年前咁最好啦，但冇可能一下子就去返嗰個時候㗎嘛，希望今年慢慢慢慢過。期望就係香港環境好，經濟好。」

妹妹吳蕙玲：內地客憂海關規例

談到今年生意，吳蕙玲直言：「好多人消費力弱，同埋好多人做網購，或者北上消費。」

對於遊客市場，她特別提到內地客源減少與海關規矩有關：「本身我哋有好多馬來西亞即係東南亞嘅客，依家少咗；內地客都少咗，因為早幾年內地嘅海關比較執法嚴謹，所有嘢都話唔俾帶。而家海關嗰度有免稅額，只要你唔超過免稅額，同埋唔係瀕危物種，唔影響農作物嘅，譬如雞蛋、燕窩、魚翅嗰啲唔俾帶，基本上其他乾海產都可以帶。但係政府嘅宣傳唔係好足，變咗普羅大眾都唔知道可以帶返去自用或者送禮，希望政府可以喺呢一方面幫嚇我哋個業界，等多啲遊客可以過嚟。海味街以前係好興旺，十年八年前係好多人行到行唔到，但係今年年尾過嚟，個境況已經唔同。」

對於透過電商平台拓展內地市場，吳蕙玲表示雖有平台接洽，但對安全性和監管有疑慮：「有商貿平台搵我哋，話可以幫我哋喺小紅書宣傳。我問過運輸渠道，佢話得一個集運點，幫我哋安排上去，但係咁你知，驚唔夠安全嘛。如果係內地政府牽頭，俾我哋持牌正當嘅供應商可以攞證或者產地來源證，我哋會安心啲，因為而家電詐好犀利。」

員工減少兩人 人工維持不變

在員工方面，吳蕙玲透露今年減少了兩個夥計。一人是正常到了退休年齡，另一人則因個人原因，可能看到行情不佳而選擇轉行。她指現在客流量減少，少了兩個夥計仍然可以應付日常營運，而其餘夥計的人工與往年持平，不會減少。

儘管市道困難，吳家兄妹均表示繼承傳統的決心不變。在拜神儀式過後，吳偉鴻亦按傳統於街頭使用燒金桶，進行化寶儀式，祈求新一年生意平穩，將老一輩傳下來的生活態度，繼續傳承下去。

（點新聞記者周傾芫報道）