跟媽咪慶生合影　古天樂凝望相片落淚

【點新聞報道】男兒有淚不輕彈，硬淨的古天樂最近因一張相片流淚，更感要珍惜眼前人。

彭秀慧主持的ViuTV節目《晚吹-Chat KP》請來電影《尋秦記》兩位主演古天樂、林峯，今集話題為「男兒淚」，更分享「現實生活中最近一次喊」的經歷，古天樂說是兩個禮拜之前的事：「個日我媽生日，同我媽食飯，咁影咗張相，影完之後我望住張相望咗好耐，我覺得我好少post我屋企人啲相出去，上一張應該有成十幾年前都有，望住張相就覺得，咩叫珍惜眼前人。依幾年無論係疫情定戰亂，突然間個世界好似變得好緊要，但點變都好，唔識珍惜眼前人係一個好大嘅問題，依部戲都有講『過去嘅嘢我地無辦法改變，但眼前嚟緊嘅嘢我地可以珍惜』，睇吓睇吓張相就突然有啲眼淚流出嚟。」

林峯分享對上一次喊是幾個月前想起家人，不過前陣子到台灣宣傳電影的日子亦令他感慨萬分，古天樂笑問：「攰到喊啊？」，林峯回應：「OK啦，開心嘅。」林峯補充自己未試過去台灣謝票：「可能咁多年嚟，其實有好多各地支持我作品或音樂嘅人，佢地會嚟睇我演唱會，但我終於去到佢地嘅城市，見到佢地咁多年，可能講緊二十年以上嘅個份支持，我會諗返起，我個演藝事業嘅原動力都係源自佢地。」不過，他指跟開演唱會的感動有不同。他說：「歌手可能舞台上可以直接面對到觀眾，演員拍野都係同同事匿埋一齊，唯一可以同觀眾接觸就係謝票，所以係好感動。」

古天樂又指謝票時見到好多四五歲左右的小朋友，他問小朋友有否看過電視劇：「佢地話無，不過話睇完電影會走去睇電視劇，依樣嘢我係無諗過，因為依家啲小朋友可能無咁好耐性，嗰時啲電視劇40集，真係要煲㗎，哇佢地竟然睇曬。」

（點新聞特約記者陳惠芳報道）