筆是機場｜英國環境每況愈下　移英港人都想回家

文/稀思路

理想同現實，往往可以完全係兩回事，當年受到政治歪風影響，有香港人決定移居英國，「尋找新鮮自由的空氣」，但去到英國，完全係另一件事，天氣差、搵工難，而且治安仲愈嚟愈差，有啲香港人最後頂唔住，選擇回流香港；有啲繼續死頂，諗住會「捱出個明天」。但網上成日有消息話英國唔掂，治安不得了，但差到咩程度？答案係，可能連「英國迷」湯告魯斯（Tom Cruise）都頂唔住！

最近有單新聞幾有趣，話說湯告魯斯因為拍戲，所以喺英國生活多年，鍾意蒲酒吧、食炸魚，不過近日就有消息指，佢已經悄悄地搬離自己喺英國嘅豪宅，原來，湯告魯斯英國住所附近，有間名錶專門店被洗劫，令湯告魯斯意識到，自己住嘅地方治安惡化緊，消息指佢喺英國嘅豪宅已經清空，佢搬咗去邊，新聞冇講，但當「英國迷」都要離開時，可以想像到情況又幾難頂。

無獨有偶，近日又有新聞話，有移居英國超過20年嘅港人，最近都喺社交平台表示自己想回流返香港，樓主話自己喺英國已經好多年，但力數英國政府嘅政策失誤，指「英國人做事效率慢、稅高、醫療差、治安差、樓價高、英鎊又跌。」更重要嘅係，當地治安差之餘，醫療服務唔好，醫生唔夠，花咁多錢納重稅，英國「窮政府」又將大部分錢用嚟社會福利上，令佢呢啲納稅人相當不滿。

其實，移居英國嘅港人想回流返香港，都唔係啲咩特別新聞，以上兩單新聞或網聞有個共通點，就係今次唔係BNO「5+1」嘅人話想回流，而係過去多年鍾愛英國，或者已經喺英國住咗好多年嘅人想走或想回流。當中因由，係英國各方面狀況愈來愈差，居住當地嘅人，交完重稅，福利唔多，仲要忍受治安、醫療服務等變差，如果居住喺一個地方嘅前提係要穩定、舒適，咁英國已經失去多年前有嘅吸引力。

無可否認，對移英港人嚟講，尤其係以BNO「5+1」移民嘅人嚟講，依家的確係處於十字路口，想喺英國生活落去，但係英國政府收緊移民條件，過唔過到年收入同英語水平要求都好難講。如果退又如何？唔少人已經辭工、賣樓同賣車去英國，基本上已經All In（將所有籌碼下注）喺英國度，依家走，變相係輸咗大部分東西，然後返香港從零開始。當初唱好英國嘅人，其實係累緊人！

筆者就覺得，依家嘅英國政府，收緊移民政策，近乎係勢在必行，因為末代港督彭定康，最近就喺BNO「5+1」簽證計劃推出五年之際，公開表示英國政府考慮收緊定居門檻，恐怕會「背棄對香港人的政治承諾」，又呼籲英國信守承諾，確保BNO港人不受追溯性政策影響。

其實彭定康一番話，可以有唔同解讀，首先係以佢政治歷練，佢都感覺到今次英國政府似乎係認真，移民政策亦會包括BNO「5+1」港人；另外就係，佢作為英國「最歡迎港人」嘅政客之一，佢除咗打嘴炮都係乜都做唔到。

筆者睇法好簡單，如果彭定康真係真心為港人，佢做港督時，又有冇或幾努力幫當時嘅港人爭取居英權？可能當時筆者年紀小冇留意到，但彭定康終歸係一個政客，英國政府做緊嘅嘢，如果彭定康在位，可能一樣會咁做。