首飾小店遭大媽蠱惑招偷竊　發帖尋人變公關災難

【點新聞報道】尖沙咀一間首飾店近日遭到偷竊，閉路電視影片顯示有女客人疑暗中偷走貨品，慨嘆店員因而失去一天薪酬，敦促涉事女子返店付款，否則不排除報警處理。惟事件引發公關災難，網民紛紛狠批店方扣薪是卸責，面對網民群起攻之，店方急急再留言補鑊「多謝海量朋友關心小編我，更正番唔使扣人工」，不過網民對此卻半信半疑。

該首飾店近日就在社交平台threads以「偷嘢」為題發文，指一名女子在店內「唔記得畀錢」，「先將睇中咗嘅貨品移去枱邊，不斷望咗店員幾次之後，最後背住店員攞走咗貨品」。該小店慨嘆「生意難做，店員咁就冇咗一日人工」，呼籲片中女子返店付款，否則或報警處理，「希望小姐你可以翻嚟畀錢啦，如果唔係我哋不排除會報警處理」。

惟網民將焦點放到扣薪之上，「做店員好慘，老闆做唔好保安措施，請唔夠人，仲要承擔有人偷嘢嘅風險」、「直接報警啦，搞咁多嘢」、「點解唔報警？對店員就嚴厲，對賊仔就寬容」、「相比起偷嘢，香港人比較關注勞工權益」、「做sales要做埋防盜？你哋自己唔管好啲保安，賴落店員度？」。有網民更質疑扣薪屬違規，「點解店員會冇咗一日人工？根據香港『僱傭條例』第32條規定，若僱員因疏忽或失職損壞/遺失僱主財物，僱主每次最多只能從薪金中扣除港幣$300元！望周知！」

面對網民群起攻之，店方急以小編身份留言，澄清「多謝你關心小編我，暫時都未使扣人工住」，但網民未收貨繼續大鬧，店方唯有再留言並置頂指不用扣薪以息眾怒：「多謝海量朋友關心小編我，更正番唔使扣人工，小編中文唔夠好，受教了，主要出片係想搵番呢個小姐返嚟。」