筆是機場｜美國中期選舉　或成特朗普「終期」

文/稀思路

自特朗普再上任美國總統以來，世界大局「沒有最亂，只有更亂」，由委內瑞拉到加拿大，由加拿大再到格陵蘭島，都畀特朗普搞亂。相對之下，世界較少注視美國國內情況，但筆者可以話畀讀者聽，美國國內「一樣亂」！除咗執法部門槍殺市民令到全城反噬特朗普外，特朗普最大嘅管治危機，係之後嘅美國中期選舉；只要共和黨選舉失利，特朗普要施政就會更困難，依家嘅特朗普，表面上耀武揚威，其實危機四伏，中期選舉或者會成為特朗普「終期」。

近日，就有傳媒報道，美國政界流出一段錄音，得州共和黨籍參議員泰德·克魯茲私下警告特朗普，如果物價繼續上升，而且民眾嘅退休賬戶「縮水」，共和黨11月嘅中期選舉，恐怕會被「血洗」。如果共和黨喺中期選舉慘敗，繼而失去國會兩院控制權，白宮亦可能會陷入連番彈劾風暴。

據報，特朗普聽到之後十分激動，大叫「去你的，泰德！」，粗暴指責克魯茲。有關錄音亦揭示，克魯茲多次私下猛烈抨擊副總統萬斯，指萬斯同保守派媒體人卡爾森沆瀣一氣，形容萬斯係卡爾森嘅「門徒」。相關嘅錄音、新聞揭示咗一樣嘢，就係特朗普嘅施政，唔止係民主黨或政治對手反對，而係佢嘅盟友、支持者都開始動搖，本來喺美國有好大影響力嘅MAGA陣營，有可能開始崩潰。

美國人嘅政治取態，看似複雜，其實有時好簡單，曾經喺一本分析美國選舉嘅書籍，用咗好多數據去分析美國大選，然後最後一個好簡單嘅結論，就係美國總統能否連任、邊個贏，最重要因素就係「經濟」；將呢個道理套落特朗普以至中期選舉上，美國國內經濟唔掂、通脹上升等，呢個回力鏢，最終都係會去返特朗普頭上。

睇美國近期嘅經濟新聞，根據美國研究機構世界大型企業研究會喺27日發布嘅初步調查數據，美國1月份消費者信心指數，由去年12月份修訂後嘅94.2，顯著降至84.5，呢個數字係2014年5月以來嘅最低水平。至於坊間睇到好實嘅通脹數據，美國11月核心通脹同比增幅創2021年初以來最低水平，不過，就有經濟學家懷疑，數字因為政府之前停擺過所以出現異常。實際通脹情況如何，真係天曉得。

特朗普四處擴張，蝦蝦霸霸，如果美國國內對佢嘅反對聲浪少，相信特朗普都可以「繼續惡落去」，不過，當美國國內對佢越來越不滿，國內物價、消費信心、醫療費用、公共資助等全部都唔掂，中期選舉一到，如果共和黨大敗，特朗普就係每個月、每個星期被彈劾，直至卸任。筆者係小薯，當然冇資格教特朗普點樣玩政治，但如果佢再唔收手，被全球各地、國家內外夾擊，到時隨時可能會「收工」。喺呢個21世紀，仲玩帝國主義，真係行得通咩？