的士車費$637含$90附加費惹議　乘客嘆：應該冇下次

【點新聞報道】搞邊科？有的士乘客分享一張的士收費錶的照片，可見車費為637元，當中附加費達90元，笑言「應該冇下次」。帖文引起網民熱議，「你做咗咩嚟？？6百幾蚊？」、「依家搭的士好貴」、「旅客包的士遊車河？」、「似漏嘢，來回2程」。

樓主在fb群組「的士司機資訊網Taxi」發帖，稱「人生第一次，應該冇下次」，從其上傳照片所見，的士到站時車費為637.3元，當中包含90元的附加費。不少網民紛紛猜測其行車路線，「屯門去鯉魚門、舂磡角去沙頭角、鴨脷洲去落馬洲… 都唔使咁貴！但石澳去大澳究竟要多少錢？可能差不遠矣！」、「麥當勞道青年會去機場跟住再返返中環」、「赤鱲角去沙頭角再去赤柱？」、「全餐過海，加大老山來回」、「哇！喺Paris坐到返HK!?」、「來回地獄又折返」。

另有一派網民估樓主去機場後漏帶證件，「應該係去機場忘記帶證件又折返？」、「機場無帶證件 即係3轉咁大把」、「去機場灟嘢，係3程車」、「作為乘客，我試過，唔記得帶嘢，折返再去過...」、「佢行到半路唔記得咗帶嘢！？」、「大埔到機場來回真係會有咁多車錢」。

眾多留言之中，有一名網民估樓主是「柴灣去上水再折返，隧道來回，大老山來回，剛好90」，獲樓主回覆「你最準」。