認愛健身教練　阿Sa甜蜜刪去「緋聞」兩字

【點新聞報道】Twins蔡卓妍（阿Sa）和鍾欣潼（阿嬌）合體今日（13日）出席飲品活動，吸引過百粉絲到場。春風滿面的阿Sa終承認與健身教練Elvis的姊弟戀，更說可删除「緋聞」兩字。

問及阿Sa是否感情穩定？她說：「OK啦！𠵱家OK就OK啦！開心咪得囉！（恭喜你！）多謝！（平時一齊做運動？）喂呀，一日問一題好啦，係咁啫住我問十題，夠喇！」早前阿Sa以尺度甚大的造型影靚相，她說：「乜都試下，唔通再過多年先試，我年紀都唔細，當留倩影。（要不要另一半同意？）我好獨立，我係獨立時代女性。」

問阿Sa有了健身教練男友有否受感染勤做運動？說：「都可以咁講，個人健康咗，所以今日我真係好熱。（身形健碩？）差唔多啦！一定唔係最瘦。（幸福肥？）係幸福囉，係咪肥唔夠膽講。」

今年是Twins成立25年，問到會否辦演唱會或跟粉絲聚會，她和阿嬌都大賣關子拒透露半句：「有就會公布，密切期待啦！（開啟德？）好辛苦喎，個場好大！（開演唱會？）密切留意啦，唔知呀！」

（點新聞特約記者陳惠芳報道）