筆是機場｜犯罪時龍馬精神　求情時體弱多病

文/稀思路

反中亂港、勾結外力黑手黎智英被判罪成嘅香港國安法案件，噚日（12日）開始進入求情階段，一如所料，反政府時「龍馬精神」嘅黎智英，去到求情階段就變成「體弱多病」，佢嘅代表律師話佢「高血壓、糖尿病等，其視網膜靜脈阻塞（「眼中風」）屬需密切監察情況」，又以體重等理由，想說明黎智英好多病痛，但就一一被控方或法官KO（擊倒、反駁）；其實，犯咗法就要找數，黎智英破壞香港、危害國安時，就應該預咗要有承擔罪責嘅一日，走唔甩。

對於黎智英一方嘅「求情」，基本上好多都被控方或法官用理據去駁回，例如黎智英嘅體重問題，控方就指出，黎智英喺2020年還柙時，體重係80公斤，其實依家或最近嘅黎智英，體重係79.2公斤，80公斤同79.2公斤，相差唔夠1公斤嘅重量。如果辯方要話瘦咗少少等於身體出問題，唔知大律師們知唔知，咩叫「清減」。

至於其他健康問題，例如辯方提到嘅視網膜靜脈阻塞（「眼中風」），法官就指出，有關情況係常見老人病。筆者過去睇唔同嘅資料，無論係身體問題、單獨囚禁（自己要求）以至其他懲教署安排，黎智英以至佢嘅代表律師都冇乜投訴，到依家要就定罪求情，黎智英「身體」就急速變化，讀者們信唔信？

黎智英代表律師嘅求情技巧，其實就係犯人以至攬炒派政客嘅「常用技」，唔知讀者記唔記得，之前非法「佔中」案，攬炒派政客求情，當時嘅被告之一陳淑莊，開庭時就呈交醫生報告，指陳淑莊腦部發現有腫瘤，需要接受腦部手術，仲話會有生命危險；神奇在，陳淑莊之後唔使坐監，身體狀況似乎都相當唔錯，完全唔似有過「生命危險」，當時仲有議員笑謔，「一到找數個個身患絕症」。

按照媒體所描述，黎智英行得走得，個人清減咗，完全唔似「健康出問題」，非常重要一點，係攬炒派政客包括「最大金主」黎智英，唔可以犯罪時就精精神神，到要「找數」就周身病痛。而且，黎智英當年豪情壯語，話自己如果入獄，將會係佢「人生的巔峰」，2020年11月，佢公開話香港喺前線代表「全世界」同中央對抗，需要世界對香港發聲及支持，如果佢最後入獄，會成為佢「人生的巔峰（the peak of my life）」，求仁得仁，依家嘅黎智英，唔係應該就喺人生巔峰咩？

從近幾個月嘅新聞可見，外國政客、外國媒體以至黎智英家人，都為黎智英打出「健康牌」，但平心而論，如果犯咗嚴重法律包括香港國安法，只要求情時打出「健康牌」就可以大幅減刑，咁香港國安法仲邊有阻嚇力，往後仲點維護國家同香港安全呢？法理以外，從社會影響去睇黎智英問題，黎智英過去多年瘋狂攬炒香港，甚至想推倒特區政府，又不斷煽動抗爭，筆者嘅結論好簡單，「肥黎，時辰到，請找數」！