筆是機場｜美國侵略委內瑞拉　必定帶來災難後果

文/稀思路

美國總統特朗普派軍突襲委內瑞拉，而且捉走委內瑞拉總統馬杜羅夫婦，受到唔同國家強烈譴責，不過唔少西方國家評論事件時，顧左右而言他，唔敢得罪美國呢個「老大哥」；網上一啲聲音，仲支持美國嘅侵略行動，一下子將黑變白，美化特朗普嘅侵略行為。根據特朗普以至美國嘅講法，美國會幫手「重建」委內瑞拉，但過去嘅經驗其實已經話咗畀全世界聽，其實美國每侵略完一個國家，最通常嘅結果，就係被侵略國家嘅環境會變得更差、更亂！

喺入正題分析事件前，筆者想先點出一組數字，特朗普喺美國重新執政一年時間都唔夠，但對外用武嘅激烈程度，已經比前任甚至前前任，有過之而無不及。根據美媒統計，美國已經喺委內瑞拉、也門、敘利亞、伊朗、伊拉克、索馬里同尼日利亞等七國實施軍事打擊，論數量而言，已經同前總統奧巴馬八年任期「打和」；喺特朗普嘅第二任期，對其他國家實施超過620次空襲，亦超過上任總統拜登執政四年嘅555次。從數字去睇，就算有人為特朗普今次侵略委內瑞拉嘅行為「點讚」，特朗普嘅真實面目，始終都係一個「全球戰爭販子」。

根據新華社分析歷史資料，自1776年美國立國到2019年，美國喺全球進行咗392次軍事干涉，其中有一半，都係發生喺1950年之後，大約四分之一發生喺冷戰結束後，而頻繁嘅政權更迭行動以至軍事打擊，對海地、阿富汗、伊拉克、利比亞、敘利亞等國嘅打擊，唔少就係因為美國所謂嘅「門羅主義」、「遏制戰略」，今日仲出現咗一個新詞，就係專屬於特朗普嘅「唐羅主義」（Donroe Doctrine）。

美國突襲委內瑞拉，一如美國過往嘅侵略行為，先指責對方有非法行為例如販毒、恐怖主義等，然後派兵顛覆別國政權，話要幫其他國家帶來「民主」、重建家園云云，但筆者講得坦白啲，係摧毁家園先真！喺網上面，筆者睇到篇文章，喺外媒寫嘅，大致內容係話利比亞領袖被推翻後幾年，利比亞陷入混亂，無有效嘅政府，唔同勢力爭奪統治權，全國有幾百個武裝組織，毒品、武器以至人口走私成為「興旺產業」，難民借利比亞成為逃亡歐洲嘅「中轉地」，甚至平常百姓生活，連停電都變成「家常便飯」，筆者要問下，美國點樣「解放」、「挽救」利比亞？

其實，網上已經有唔少分析，估計委內瑞拉往後嘅局勢會差，而美國覬覦嘅石油利益，亦唔會咁容易得到，可能投入巨大成本之後，收益不如理想。正當一啲「專抱西方大腿」嘅人為美國侵略行動「喝彩」時，讀者們可以持續留意，往後嘅委內瑞拉局勢會變成點；哪怕美國最後排除萬難得到利益，筆者始終都係嗰句，特朗普嘅行為，係一場不合法、不公義嘅戰爭，而美國嘅憲法，喺特朗普管治下，真心講，明顯已經變成一張廢紙！