筆是機場｜軍事襲擊委內瑞拉　特朗普是赤裸裸的侵略者

文/稀思路

上周六（3日），美洲發生一單駭人聽聞嘅侵略事件，一直想強搶委內瑞拉石油資源嘅美國總統特朗普，竟然派兵突襲委內瑞拉，仲捉到其總統馬杜羅夫婦，引發世界各國譴責。按照特朗普以至美國嘅聲稱，馬杜羅涉嫌犯下毒品、恐怖主義等罪名，其實講得坦白啲，美國就要去推翻人哋政權，再強佔人哋嘅天然資源，如果真係要講恐怖主義，似乎美國先係相當恐怖！

對於美國嘅侵略行為，世界各國都強烈譴責，中國外交部發言人就表示，中方對美方悍然對一個主權國家使用武力並對一國總統動手深表震驚，予以強烈譴責。美方的這種霸權行徑，嚴重違反國際法，侵犯委內瑞拉主權，威脅拉美和加勒比地區和平與安全，中方堅決反對。巴西總統盧拉譴責美方做法逾越「不可接受的界線」，為國際社會開咗極度危險先例。

另外，古巴國家主席迪亞斯—卡內爾喺社交平台X譴責美國從事「國家恐怖主義」，形容「我們的和平區域正遭受殘暴攻擊」。哥倫比亞左翼總統佩特羅，亦喺社交平台X表明拒絕委國和拉美主權受侵犯。值得留意嘅係，除咗中國，另一大國俄羅斯外長拉夫羅夫亦表明，俄方堅定支持面對武裝侵略嘅委內瑞拉民眾。

睇網上評論，總有西方國家支持者，對美國軍力、突襲能力歌頌一番，但筆者想讀者們睇清楚事實，就係美國嘅行為，就算特朗普以至美國政府點講，都係一場赤裸裸嘅侵略行動，由特朗普同傳媒講嘅嘢亦可見，美國咁做，其實最大目的在於委內瑞拉嘅石油資源，想強佔人哋國家資源，自然要搵出好多所謂「理由」。

當然，事件背後仲有其他深層次原因，如果要筆者再分析，其實美國嘅強力軍事行動，緣於特朗普內心嘅虛怯，特朗普內心嘅恐懼，唔係怕美國軍力唔夠強，而係怕美國逐漸失去國際影響力；從美國內部去講，上任總統前，特朗普講到自己「什麼問題都能解決」，但上任後搞到國內一團糟，中期選舉即將來臨，內政唔掂，外交唔得，特朗普用嘅解決方法，就係藉軍事行動轉移視線，想向美國民眾證明自己「強大」。

依家委內瑞拉以至美洲嘅局勢，特朗普仲想向其他國家顯示「順我者昌，逆我者亡」，如果其他美洲國家唔聽特朗普話，都有可能隨時被攻擊、針對。講真，其實特朗普嘅言行，擺明係恐嚇，當一個國家總統成日話自己點樣和平，點樣調解其他國家嘅戰爭，但另一方面就派兵侵略其他國家，似乎太過人格矛盾！喺委內瑞拉事件上，國際社會包括歐盟等都唔可以退讓，否則特朗普今日對美洲國家動手，他日一樣可以對格陵蘭等動手，盟友隨時可以變被侵略者。至於美國民眾，一樣都要清醒，特朗普嘅軍事行動，唔應該掩蓋到國內施政嘅不濟。