筆是機場｜從政敵主政城市撤軍　特朗普又敗一仗

文/稀思路

之前筆者都講過，美國總統特朗普想對加拿大、格陵蘭動手，又對委內瑞拉動武，係一種帝國主義嘅表現；其實，特朗普除咗對外霸凌，對內一樣係「郁手郁腳」，為咗打擊政敵，特朗普就喺洛杉磯等地方部署國民警衛隊，用軍隊鎮壓市民、移民。最近，佢宣布當局會從洛杉磯、波特蘭同芝加哥三個城市撤走聯邦政府部署當地嘅國民警衛隊，並聲稱係因為喺國民警衛隊進駐後，呢啲地方「犯罪率得以明顯降低」，事實係咪咁理想？梗係唔係啦，因為特朗普嘅部署軍隊或警衛隊行動，又敗一仗先真。

之前，特朗普多次聲稱當局有必要喺洛杉磯等城市部署國民警衛隊，以打擊犯罪同保障聯邦財產同人員免受示威者侵害，最近佢宣稱喺相關城市嘅犯罪率，因為警衛隊進駐而下降，所以可以撤軍喇。不過，佢又指出如果呢啲地方犯罪率再次開始飆升，警衛隊會「再次回來」，唔講會以為，因為特朗普派駐警衛隊，令呢啲城市治安好咗好多。

事實係點？實情係特朗普嘅派駐行動，受到法律挑戰而必須撤軍，聯邦第九巡迴上訴法院裁定，特朗普政府必須將加州國民警衛隊指揮權，交還畀加州州長紐森。另外，美國最高法院早前亦初步裁定，特朗普政府不能向芝加哥派遣國民警衛隊。目前，喺不同嘅訴訟當中，特朗普政府只可以暫時派駐國民警衛軍駐扎華盛頓。

筆者講嘢一直坦白，從此至終，其實特朗普嘅派駐警衛隊行動，都係一場政治行動多於維持治安，因為特朗普要派軍嘅地方，係由政治對手民主黨所主政嘅城市，例如加州州長紐森，就係成日批評特朗普嘅政客，而紐森亦指，特朗普無視憲法同聯邦法律，佢歡迎加州國民警衛隊成員重返州政府服役。芝加哥所屬嘅伊利諾伊州州長普里茨克就表示，特朗普撤軍係別無選擇，因為特朗普喺法庭敗訴。

有時候，筆者相當佩服特朗普嘅「口才」，想透過警衛隊打擊民主黨主政嘅地方或者政敵，喺法律上受到挑戰，但就唔承認失敗，而係將故事完全掉轉嚟講，話自己喺國內嘅行動已經「勝利」所以撤軍；用另一角度諗，如果特朗普政府喺法庭勝訴，又會唔會因為犯罪率下跌而撤軍呢？筆者認為未必，因為特朗普由頭到尾，都係睇住民主黨嚟部署軍力，對手一日喺度，以佢性格都係會一直針對。

如果讀者們有留意國際新聞，包括美國嘅新聞，其實特朗普依家情況相當不利，根據路透社最新民調，特朗普嘅支持率跌至39%，另外只有33%美國成年人認同特朗普處理美國經濟嘅方式，喺經濟議題上，呢個支持度可以話係新低點。特朗普自己都承認，之後嘅中期選舉，物價會係核心議題。另外有調查指，接近一半美國民眾認為，難以負擔多項生活開支，筆者覺得，中期選舉雖然未進行，但特朗普所屬嘅共和黨已呈敗象，加上支持特朗普嘅陣營都開始出現矛盾，唔同跡象顯示，特朗普喺國內、國外都開始失去力量，2026年，真係要「祝特朗普好運」喇！