筆是機場｜特朗普的「新型帝國主義」

文/稀思路

特朗普想攞諾貝爾和平獎，你知我知，全世界都知，佢一直向外聲稱，自己出手停止咗幾場大小戰爭，想話畀全世界知，佢致力促進和平，甚至係推動世界和平嘅美國總統；不過，事實係佢有佢講，全球各地嘅人都睇到，其實佢係一個「侵略者」，甚至擺明車馬想食咗人哋成個國家，當中包括委內瑞拉同格陵蘭島，近日佢喺委內瑞拉嘅一系列軍事行動，筆者就覺得，特朗普明顯係為咗石油資源，搶得就搶！

關於委內瑞拉，之前筆者都寫過，特朗普美其名打擊毒販，其實最終都係想吞併人哋嘅資源，本來打擊、堵截毒販，絕對唔需要出動軍隊，但特朗普唔單止出動軍隊，而且唔係捉毒販咁簡單，而係成條船轟炸，受到國際社會譴責，但特朗普一於少理，繼續軍事行動，甚至開始封鎖委內瑞拉嘅油船。

美國對委內瑞拉嘅石油運輸進行封鎖，肯定已經超出當初打擊毒販嘅原意，美國要對委內瑞拉嘅石油實施「隔離」，其實就係想委內瑞拉嘅石油運唔到出去，想迫使委內瑞拉總統馬杜羅自行落台。特朗普咁做，有媒體就分析，美國係想攞返美國公司喺委內瑞拉石油公司嘅主導權，要委內瑞拉石油回流美國，但相關行為，其實同強搶基本上係冇分別。

受到美國威脅嘅，當然唔止得委內瑞拉，喺格陵蘭島，特朗普更加係想將成個格陵蘭島吞併，所以特朗普近日就公開強調，「美國必須得到格陵蘭」。由特朗普再上任開始，已經唔係第一次講過要得到格陵蘭島，同委內瑞拉情況唔同嘅係，特朗普係想將成個格陵蘭島納入美國版圖，當中既有天然資源嘅考量，亦係想將北極航道掌握喺美國手，同時將資源、戰略要地等搶到手。

有評論就指，特朗普所奉行嘅係「資源帝國主義」，筆者就覺得，特朗普行緊嘅係一套「新型帝國主義」，佢嘅特別之處在於，美國一方面行緊民主制度，講自由、權利；但另一方面，就係「搶得就搶」，相比起其他方式嘅帝國主義，美國基本上想搶委內瑞拉資源、吞併成個格陵蘭島，講到好正義咁，實際係「嚇」、「打」同「搶」，當世界各國以為21世紀再無帝國主義時，美國就以「和平使者」身份周圍去搶。

根據美國嘅最新戰略，歐洲甚至亞太都唔係美國最大嘅關注，美國真正關注嘅係自己以至美洲利益等，中國可以競爭，俄羅斯唔係死敵，但該到手嘅資源、要道就一定要掌握在手，委內瑞拉嘅石油要搶，格陵蘭島主權理應屬於丹麥，打埋算盤都係盟友，但美國一樣要搶。呢種「新型帝國主義」，係美國打住民主旗號，但就恃住強大嘅軍力，迫使其他國家屈服。有時候，筆者都會諗特朗普係咪有少少人格分裂，一邊想調解唔同戰爭，一邊又周圍搶，佢想攞諾貝爾和平獎，但退一步講，當美國為咗爭奪資源去殺人、搶掠時，特朗普到底係和平者，定係侵略者？相信世界各地人民，都有清晰答案！