筆是機場｜只有8%移英家庭符合定居條件？英國政府太狠了吧

文/稀思路

稀思路一直關注唔同議題，包括國際政治、港人移居等議題，而當中寫得最多嘅議題，可能就係港人移英問題，呢個議題唔同港人移居加拿大或者澳洲，基本上每隔一段日子，就會有新聞出現，尤其係英國政府不斷搬龍門，一時話收緊移民條件，一時又話港人持BNO移英唔受影響，最新新聞係，如果英國政府真係收緊定居門檻，完全符合定居條件嘅港人移民家庭，可能只有8%，讀者們冇睇錯，係8%！

話說，英國政府正醞釀收緊移民定居嘅條件，當中最辣嘅條件，莫過於英語水平同年收入兩項要求，前者要移民人士嘅英語水平符合英國高考嘅水平（B2），後者則要求移民人士有大約13萬港元嘅年收入；如果係大學畢業、有穩定職業嘅移居者，可能都唔難符合要求，但如果係低學歷人士或者係家庭主婦，點可能符合資格？英國政府如果真係實行計劃，等於將好多移民拒諸門外。

所以近日，就有工黨國會議員正式向政府發出聯署聲明，強烈呼籲內政部豁免約20萬名已移英BNO港人，以免違背當初「政治承諾」，睇相關報道，根據工黨議員嘅調查，如果嚴格執行B2英語要求，喺受訪嘅6667名BNO港人當中，竟然只有8%家庭完全符合條件，另外就有高達43%家庭，佢哋當中係冇家庭成員可以達標。

換句話說，若然英國政府執行改革，用BNO移居英國嘅港人，唔係部分，而係大部分家庭都唔符合定居資格，有工黨議員發聯署聲明向英國政府施壓，但會否成功未知，甚至乎英國政府會唔會聽呢啲意見，都好難講。

從港人角度睇，英國政府遷就港人移民，好似好合理，但英國情況唔係我哋想像中咁簡單，喺英國，非法移民乃至合法移民嘅問題，已經令英國出現嚴重矛盾，非法甚至合法移民，已經從治安、就業、經濟等問題影響到英國本地人，英國本地人反對移民，除咗係反對非法移民，其實都有人劍指合法移民，如果執政黨要維護港人移民，可能就有機會得罪更多選民。

筆者睇新聞，根據今年9月關於英國嘅民調，其實英國執政黨工黨，其支持度已經畀極右翼政黨英國改革黨反超前，而且兩者支持率，仲相差成9%，如果情況持續，工黨之後有可能唔再係執政黨。改革黨嘅最有力宣傳，就係反移民政策，工黨如果強行保住部分移民，有冇可能令自己流失更多支持？筆者唔肯定，但從政治角度睇，工黨嘅選票利益，明顯大於外來移民嘅利益。

喺支持港人移民嘅英國議員看來，有港人因為「香港國安法而移民」，但呢種講法，係咪站得住陣腳？講治安同法治，香港比英國更好，而且社會更為安全同穩定，移英港人有唔同理由所以選擇移民，只係，佢哋揀咗一個以為可信嘅地方，結果依家隨時被捨棄。筆者一直維持一個基本觀點，西方國家例如英美，根本就信唔過，希望移英港人能夠度過難關，唔會畀英國政府玩死吧。