裝修工將叉車當梯子修招牌　網民揶揄「一失足成千五蚊」

【點新聞報道】作為稱職的裝修工人，既要有技術亦要有膽識，但無論如何同樣要重視安全問題！近日網上流傳一張相片顯示，一名裝修工人工作時竟將叉車當梯子作業，場面令人心驚膽戰。

有網民於社交平台上傳相片，並配文「呢位師兄真夠膽！」。從其上傳的相片可見，一名男裝修工站在叉車上面的木箱上修理店舖招牌。目測叉車升至數米高，而叉車旁還站着一名男子，男子單手扶着叉車疑似為保持叉車平衡。

帖文引發熱議，許多網民批評「冇安全帶，卡板唔穩跌落就會撲頭」、「看似很危險，其實一點都不安全」、「電唧車（叉車）好硬淨㗎！但係企喺上面個人就唔知硬唔硬淨啦！」、「正常嚟計鏟車就好穩陣要翻車就難啲，係驚佢自己突然失重心跌落嚟就大鑊啲」、「佢可能係老細，想慳安全工作台」。

另有網民則直指此舉屬違法行為，「佢大膽在唔驚畀人告」、「一失足成千五蚊」、「移動搬運裝置不能載人！勞工處可檢控」、「超2米，冇頭盔、冇安全帶，犯法㗎，仲係（喺）煩（繁）忙地方」。