筆是機場｜美國禁毒　要用軍隊殺人？

文/稀思路

有時，我哋會同人講笑「殺雞焉用牛刀」，但睇下今日嘅世界，原來唔係講笑！話說，因為非法毒品問題，美國為咗阻止毒品由委內瑞拉流入美國，已經出動軍隊去打擊委內瑞拉嘅船，甚至出現成條船炸散嘅情況。當筆者以為件事已經夠癲嘅時候，美國總統特朗普嘅行動更係超出筆者想像，因為特朗普日前就警告，可能會對委內瑞拉實施陸地打擊，兩地隨時開戰，有需要咁做？

本月2日，特朗普喺白宮舉行內閣會議，表示「我們將開始實施陸地打擊。你知道，陸地打擊要容易得多，而且我們知道他們路線」、「不只委內瑞拉，哥倫比亞也在名單上」，其實，唔少美國議員已經警告政府，喺未授權之下，對委內瑞拉採取軍事行動代價高昂，係重大錯誤。不過特朗普似乎一於少理，為求達到目標，不惜用軍隊打擊毒販。

美國嘅軍事行動，其實係繼關稅戰之後，又一次與世界為敵嘅鐵證，除咗有西方國家表明唔會再分享海上資訊畀美國，聯合國人權事務高級專員蒂爾克亦譴責美軍嘅打擊行動不可接受，必須立即停止，國際法列明「只有在對生命構成即時威脅才允許使用致命武力」。但美國當局公開嘅信息顯示，船上疑犯似乎唔會構成對他人生命有即時威脅，美國必須停止打擊，避免船上疑犯被「法外處決」。

至於中國作為負責任大國，當然亦有就美國非法殺人發聲，中國外交部發言人林劍12月3日表示，中方反對任何違反聯合國憲章宗旨和原則、侵犯別國主權安全行為，反對外部勢力以任何藉口干涉委內瑞拉內政。中方呼籲各方共同維護拉美和加勒比和平區地位，避免局勢進一步升級。筆者就覺得，美國嘅軍事行動，可能冇咁簡單。

表面睇，美國因為毒品流入，所以採取行動，但諗真啲，如果純粹反毒品，美國可以有好多手段，唔駛搞到咁大件事，一個比較可能嘅想法，係美國想推翻委內瑞拉現有政權。喺委內瑞拉國內，有民調顯示，大部分受訪者都認為，美國嘅真正目的，係要奪取委內瑞拉嘅石油同其他自然資源，而委內瑞拉總統馬杜羅亦批評，美國以緝毒之名，想用武力手段奪取委內瑞拉嘅石油資源，據報馬杜羅為防止被殺害，而家每一晚都要更換過夜地點。

可能有人會話，美國會唔會咁狼，為咗緝毒或石油，要推翻人哋政權咁過分，但筆者借用美國知名學者弗里·薩克斯一番話，薩克斯指出，美國唔止係經濟脅迫手段嘅最大施加者，仲曾經喺42年間對他國施行64次秘密嘅政權更迭行動。

筆者想講，對美國而言，其他國家邊個當政唔重要，最大化美國利益先係最重要，而家嘅委內瑞拉，就係最新好例子；再回想一下，非法「佔中」、黑暴運動，點解美國黑影處處？美國會真心想香港好？其實都係想推倒特區政府，繼而打擊中國！如果中國國力弱、頂唔住，俾美國打擊到，今日作為中國人嘅你、我、他，都會受到影響，所以對住美帝，必須小心，唔好當人係洋主子！