移民講人系列｜港男身家35萬恨移英 　擔心生存唔到發帖求教

【點新聞報道】講真，以逃避心態移民，咁樣走去第二個地方生活，都唔會好得過去邊。近日有一名25歲港男發文話，想用BNO簽證移民，但身家只得35萬港元，擔心生存唔到，遂問網民夠唔夠喺曼城落地喎。

該名欲移英的25歲港男在社交平台threads發文，求教網民「攞35萬喺曼城落地夠唔夠？可以生存到幾耐?」，又追問「或者大家對我呢個年紀/situation想移民去英國有無咩建議?」。

港男表示，大學畢業後，工作了兩年多，人工兩萬幾，話自己無事業心，份人好慳，「香港乞食科u grad，做咗兩年幾文職、做得唔係好開心、無咩事業心/上進心、唔求發達、夠洗就得」。港男自喻宅男一個，「喺香港本身都係獨家村多、唔太多娛樂、平時都係睇下YouYube/Netflix/書/瞓覺」。

港男表示，屋企人有BNO，所以在大學畢業時便興起移民的念頭，「其實兩年前grad嗰陣有念頭想去但無錢，中間做咗段時間嘢無咗個念頭，最近可能特別唔開心所以又有返」。

不少網民質疑樓主未搞清自己所追求的生活，「你都未諗定自己想點，不如research下英國啱唔啱自己先？」、「唔係睇小你定咩，但後生、錢唔多、冇目標，過到嚟英國隨時迷失過你係香港，搵到「夠洗」嘅錢都唔係咁容易」、「如果係因為想去而去，咁當然好。如果係因為想逃離而去，要諗清楚」、「諗清楚係想離開香港，定畀英國吸引，英國都唔係一個咁美好嘅地方」。

有網民就幫樓主計數，「35萬一個人，搞個visa IHS同單程機票冇咗6萬，落地當你好好彩搵到屋，upfront 一年，當£1000租，又冇咗12-13萬。水電上網council tax，一個月£200，伙食交通£200-300。搵工平均半年至一年，當要燒一年錢，即係生活開支又5-6萬。咁一年後都有十萬蚊多啲淨嘅，但萬一續唔到租一年後又要搬屋，下一個業主見你冇工作又要求upfront一年，咁就閣下自理。」

另有網民支持樓主拎住35萬移英，「你個生活習慣好適合，唔知嚟到啱唔啱咪整住2.5年visa試下先，35萬唔大使點都捱到一年啦，」、「35萬，你一定要落地就立即搵嘢做」、「夠嘅~但可能要諗吓係咪真係喺曼城落腳!!畢竟你都仲有你嘅career~」。