港女大呻銀行戶口被凍結　得返$20「只能食樹皮！」

【點新聞報道】銀行存款突然被凍結？！有港女於社交平台發文大呻，她使用某虛擬銀行約2個月，其間收到了5,000 港元的存款，其後她發現賬戶被凍結。她於是跟銀行客服查詢展開一場大戰，她展示了賬戶只剩下20元，大呻「得返$20現金」、「要行獅子山返工，食樹皮」，惟客服依舊只回應正在調查，需要時間才能解決，令港女十分沮喪。

該名港女在社交平台threads發文話，「（虛擬銀行）係真係幾好用，但唔建議大家擺晒啲錢入去」。該港女於11月7日在社交平台Threads發圖發文，指她使用某虛擬銀行約2個月，近日卻在無預警下被凍結，「主要都係上網買下嘢，最大條數都只係5k（5000元），咁都凍結，已經幾日」。

樓主憶述，她當日下午仍在正常使用戶口，到凌晨突然無法使用，致電銀行客服查詢才知戶口被凍結，「凍前3日收過一單freelance job嘅錢，但只係5k，冇即時匯出，之後只係上網買過嘢/出街買嘢俾錢，用咗一千 」。

戶口被凍結後，樓主連日透過短訊與銀行客戶服務員理論。樓主並上載與客服對話截圖，可見客服起初稱已經說明需要加急處理，請樓主「耐心等待」，樓主追問「點耐心？1條大數都無出入過都凍結，我要用錢㗎喎，你陣間放lunch都要錢食飯啦，我食咩？有無得暫時解凍畀我拎返錢先，你哋再慢慢查」。客服回覆沒有權限解鎖帳戶，而相關部門未到上班時間，建議樓主2小時後再聯絡，並問「目前有無其他幫到你」。樓主表示「冇，不過陣間可能要借幾嚿水畀我生活」，客服即表示「此聊天室將會先行關閉。歡迎隨時聯絡我哋，祝你有愉快的1天，拜拜」。

2小時後樓主再聯絡客服查問情況，並展示銀包只有60元現金的相片，問「畀唔畀人生存，凍晒我啲錢，我得返$60現金。」客服其後只表示抱歉，因戶口「正在實行日常審查」，暫時未能轉款，會要求有關部門盡快處理。樓主不滿地連番追問，「盡快即係幾時」、「而家唔係不便呀，係我陣間要去街邊乞食呀」、「你哋公司有無咩係幫到我？」、」「除咗叫我等」，客服重申有關部門確實需時處理案件。

約4小時後，樓主再聯絡客服展示銀包只有20元的照片，「得返廿蚊現金，其他錢俾你哋凍結咗」、「請問可以暫時解凍未，無錢用，我聽日就要行獅子山返工，食樹皮」。客服重複叫樓主耐心等候，重申帳戶仍在審查，會申請加急處理。

然而，翌日早上樓主戶口仍未解封，便再聯絡客服，並上展示手執樹皮相片，「我今日只能食樹皮」。惟客服只回覆「明白您的情況，我們會通知相關部門盡快處理」。

至戶口被凍結第4天，樓主再聯絡客服展示一張快餐店別人食剩物品，「我戶口已經畀你哋凍結咗4日了，冇晒錢搭車食飯，噚晚放工行獅子山返屋企太攰，唔記得準備今日食嘅樹皮，公司附近又冇樹，只好做麥難民了......，請問幾時可以解凍，或直接畀我取消戶口？」。

不過，客服仍只是「人肉錄音機」式回應，「不好意思為你帶來不便，會通知相關部門盡快處理」樓主無奈問，「盡快都等咗4日喇喎，取消戶口拎返錢唔用你哋得唔得」，客服重申「戶口仍然在審查中，暫時未能轉帳，耐心等候」。樓主追問「咁要審查幾耐？會唔會超過一個月」，客服回覆「視乎部門處理」。

最後，樓主向客服提出「可唔可以免息借啲現金畀我頂住先，做你哋客人冇諗過要乞食」，客服只重覆致歉，表示「未有相關功能」，請她「耐心等候」。另外，樓主在留言區表示曾要求取消戶口，但客服指要待審查完成，「佢話要等佢審查完先可以取消服務」

帖文引來網民熱烈討論，「呢個故事就教訓大家，唔好將全部雞蛋擺喺同一個籃度」、「你真係執咗樹皮嚟影相咁有心」、「你仲可以咁幽默好勁，向你學習」、「明白你的情況，我們會通知相關部門提供更多樹皮」、「經一事 蔡一智」。

有網民講述相同經歷，「我都被凍結過，最癲係凍到連信用卡還款呢個動作都唔畀我做，但又要當我遲交罰息，打咗勁多次去申訴，之後冇再用過」、「我都咁比Mox鎖過一次，好彩唔多錢，佢哋又係十問九唔應，嗰次玩咗我三個月」。

不過，亦有網民認為銀行只是遵守法例，「銀行有生意一定會做，問題係香港有反洗黑錢條例，如果佢哋唔跟會俾MA（金管局）罰」。