食客打邊爐掹走Gas「搞到個爐噴火」 港女：爭啲俾人謀殺
【點新聞報道】打邊爐都要有常識！有港女在社交平台分享用餐時的驚險經歷，指日前在連鎖日式牛丼店食壽喜燒時，鄰桌有女食客在卡式石油氣爐還未熄火，便直接掹走石油氣瓶，「搞到個爐噴火」，直指「食壽喜燒食到爭啲俾人謀殺」。
該名港女在社交平台threads發文指，日前首次到連鎖日式牛丼店Sukiya吃壽喜燒，卻「食到爭啲俾人謀殺」。她表示，用餐其間鄰桌有女生傳出尖叫，原來對方未有關爐，便直接拔走石油氣瓶導致噴火，「食食下中間張枱個女仔突然間喺度尖叫，原來係佢未熄火就掹咗個爐支gas出嚟，然後搞到個爐噴火」。
港女大讚店員反應迅速，「當時店員係做得ok，尖叫嗰下就即刻了解咩情況，然後安撫到個女仔同收走燒燶嘅嘢」。港女事後回想猶有餘悸，表示「如果佢支gas夠氣我諗在場所有人都變曬熟人」，並慨嘆「好癲，原來打邊爐都要有常識嘅」。
帖文引起網民熱議，「呢啲就所謂蠢比惡危險，俾店員整咪算」、「啲後生可能用開電磁爐，未用過gas爐？」、「乜唔會有safe lock，未閂火都掹到咁癲」、「壞人絞盡腦汁，不如蠢人靈機一動 」、「蠢就唔好隨便出街害到人 」、「用gas爐真係要有常識。以前廣告都有賣，打邊爐最緊要係個爐」。
有網民分享類似經歷，「我去遊學團個陣有個領隊唔識用gas爐打邊爐，又係夾硬掹支gas（滿gas）最後原地爆炸直接入院，呢個故事話比大家知一支gas爆起上嚟係會波及方圓2-3米內嘅人」、「以前吉野家，見過有人諗住吹熄酒精燈，點知倒瀉咗成張枱着火 對面個阿姐好叻，用杯茶倒落去，係無用的」、「前排去7-11叮嘢，見到有部微波爐着閃光，有個蠢男仔成個杯麵連錫紙放入去，之後就行開咗去睇貨架，我即刻撳停再問邊個放錫紙入去叮，我成日都覺得便利店員工搵命博，你唔知啲人放咩入微波爐」。
