筆是機場｜如果沒有稀土　美國還能造出戰機艦艇？

文/稀思路

近日，中美關稅戰再起硝煙，中國對稀土採取出口管制，素來以「關稅當武器」嘅美國總統特朗普，就話要向中國進口美國貨品加徵100%關稅，仲表示要對所有關鍵軟件實施出口管制。喺呢場關稅博弈，爭端由美國挑起，近幾個月通常都係美國嚟一拳，中國還一腳，今次特朗普再玩極限施壓，表面就好威，但筆者想讀者們諗一個問題，如果冇稀土，美國仲有冇能力造戰機、戰艦呢？玩到最後，美國會唔會「殺敵一千，自損五千」？

筆者之所以咁問，係因為以稀土發掘、精煉嘅過程，全世界有完整產業鏈而近乎壟斷市場嘅，基本上就係得中國；而中國主導市場同時，美國其實極度依賴稀土進口，網上就有文章指出，中國嘅組合拳，打在美國軍工嘅七吋之上，例如生產一架F-35戰機，喺雷達、制導裝置等組件上，需要消耗417公斤稀土；如果係生產一艘核潛艇，更可能要用4000幾公斤稀土。特朗普想再加中國關稅，但特朗普都要明白，到底依家邊個先係「No Card」（冇牌打）。

筆者好坦白地講，稀土作為重要物資，中國有出口管制非常合理，管制稀土甚有道理。過去幾年，美國為咗打壓中國嘅創新科技發展，喺科技領域全面針對中國，製造高端晶片需要精密嘅光刻機，美國唔畀ASML出口精密光刻機到中國；部分中國企業例如華為，更加係連購買高端晶片都唔畀買。美國為首嘅國家唔賣創科物品畀中國，咁如果中國有一日又唔賣可以製造創科物品嘅稀土畀美國，邊個傷啲呢？

工業、軍事製造能力，係成為強國嘅重要關鍵，美國想鎖中國喉未必鎖到，就如華為等中國企業，已經開始研發、應用緊自己嘅高端晶片，其實關稅戰打落去，最蝕章嘅係美國自己，因為除咗對稀土等依賴，美國工業已經大不如前；相反，中國係全球唯一有「全產業鏈」優勢嘅國家，製造不同物品都可以「不求人」，特朗普做「Deal」（生意）叻，但當佢做「生意」嘅原材料掌握喺中國手中，美國可能連產品都造唔出。

美國最後會唔會退縮，筆者唔肯定，但睇返美國近幾個月對中國開打關稅戰嘅時序表，美國絕對有退縮嘅歷史經驗，例如美國喺4月2日宣布對等關稅，中國反制。去到5月12日，中美聯合聲明發布，同意暫停實施24%「對等關稅」。之後拉鋸到8月，特朗普簽署行政命令，將美國對華關稅暫緩期延長90天，雙方一直談判。今次特朗普再次要對中國加徵關稅，一個直擊核心嘅問題，係特朗普就算自己捱得，國內企業同市民，都未必好捱得，當國內缺物資、物價升嘅時候，可能又到特朗普搵下台階嘅時候。

如果我哋留意特朗普政府嘅說法，仲會發現一個位，就係特朗普宣布對中國加徵關稅嘅日子，係11月起生效，筆者估計，特朗普政府將新關稅生效日期定喺11月，其實佢個人都未必想到時加徵中國關稅，但係作為關稅戰嘅「始作俑者」，筆者覺得佢始終要認清事實，中國同其他國家唔一樣，唔會任由美國欺凌，就如商務部新聞發言人所言，中方立場一貫係，「我們不願打，但也不怕打」。