英改革黨倡廢永久居留　移英港女炮轟收緊移民政策

【點新聞報道】話說英國改革黨提倡廢除移民永久居留，有移英港女被激到紮紮跳，發文炮轟「冇外來人，英國唔單止『冇生產力』，直頭連基本運作都停擺」喎。

英國改革黨始創人兼黨魁法拉杰（Nigel Farage）日前發表政策綱領，稱如果該黨贏得下次大選，將取消現行定居英國滿5年有資格申請ILR 、並在取得ILR身分一年後有資格申請入籍的「5+1」法律規定，改以每5年申請續簽工作簽證。回答記者時，更明言會影響持BNO簽證的移英港人和烏克蘭人。

擔心好夢成空的移英港女，在社交平台threads發文炮轟，「成日有人口口聲聲話『要收緊移民』，今日Farage又走出嚟講乜『香港人、烏克蘭人一個都唔批』。講到尾，呢啲政策唔係為咗救英國，而係為咗救佢自己啲選票。現實就係：冇外來人，英國唔單止『冇生產力』，直頭連基本運作都停擺。」

英國一直靠移民撐起勞動市場，樓主指「咁我想問句：36% NHS醫生係非英籍，30%護士都係，仲有22% NHS staff。即係你今日趕晒佢哋走，明日你去A&E，可能得返部自助check-in 機幫你睇病。」、「仲未計care workers 32%係外國人，食物生產40–50%係海外出生，農場工人12%都係靠外勞。」

嬲到爆的樓主出言嘲諷法拉杰，「你Farage有種咪落田捉牛耕田，落廚房包餅，夜晚再自己幫自己插喉打點滴。」有網民亦留言揶揄「政客梗係為選票，所以叫做政棍 」。

不過，有網民突破盲腸話，「老實講句，人哋一開始就講到明反移民，從來都冇話反正式定或者非法移民。係有班人spin話佢哋非法移民，依家咪好囉，將佢哋幻想破滅」、「你而家才知道自己不受歡迎？！」。