巴士大媽屯門嘈到龍翔道　港女出聲制止獲網民大讚

【點新聞報道】乘車時保持車廂安靜，是應有的禮貌。有港女在社交平台發文稱，日前搭乘巴士時，在上層遇到一群大媽「由屯門嘈到龍翔道」，她忍無可忍之下，惟有轉身向後方喝斥「細聲啲啦，當自己屋企呀？」，隨後車廂瞬間回復安靜。不少網民都大讚樓主「你好型啊！」、「其他乘客一定好多謝你」。

該名港女在社交平台threads發文憶述事發經過，指日前搭乘巴士時，在上層遇到一群坐在車尾位置的大媽，形容她們「佢地目中無人」、「由屯門上車嘈到龍翔道都仲嘈緊」。樓主指，平日會戴上降噪耳機隔絕環境噪音，但當日竟然破功，「平時我會塞住耳仔，但佢哋嘅聲音連降噪都可以突破到」。

樓主在忍無可忍之下，惟有出聲制止，「我由車頭擰轉頭勁大聲咁嗌左句『細聲啲啦，當自己屋企呀？！』」，隨後車廂瞬間回復安靜。她更笑稱「呢一句已經收咗佢哋皮」、「落車嘅時候所有人望住我」。

不少網民都大讚樓主「英雄」、「你好型啊！」、「好正，做得好！好想在場鬧埋一份！」、「其他乘客一定好多謝你」、「成車人心裏畀個Salute（致敬）你」、「勇氣可嘉」、「感謝你肯出聲」、「有時候一句大聲的提醒，比任何降噪耳機都管用」。

有網民則分享類似遭遇，「上次搭290A，有巴基妹講電話由寶琳嘈到秀茂坪，我忍無可忍大嗌咗句：『嘈夠未呀？落車講啦好無呀？』世界頓時安靜」、「有一日我搭地鐵又係，街市咁嘈，大佬，真係諗唔明白！係咪個個食完晚飯好興奮呢？」。