筆是機場｜特朗普干預市場　美國陷入「民主的獨裁」？

文/稀思路

攬炒派、反對派人士等，一直對西方制度趨之若鶩，話西方國家「民主」、「三權分立」以至權力制衡得好好，如果有國家領袖做得唔好，選民就有權力「換個更好」嘅，但呢種行咗以百年計嘅制度，讀者有冇諗過，其實已經走向另一極端，就係社會嘅分化同矛盾，已經去到一個冇得調和嘅地步？又或者，如果有領袖無視法律，西方國家會陷入「民主的獨裁」？筆者唔係講笑，最近睇美國總統特朗普做嘅一切，基本上，佢已經去到為何欲為嘅地步。

自特朗普上任以來，就一直盯住聯儲局，因為特朗普一直想聯儲局減息去刺激經濟，但聯儲局就認為，如果喺呢段日子減息，會推高通脹，弊大於利，所以就一直頂住壓力，唔減息；最近，特朗普就指美國聯儲局理事庫克涉嫌詐騙，宣稱她偽造銀行文件，企圖獲得優惠房貸條件，所以要解僱佢；但庫克就反擊，話特朗普無權炒佢，計劃控告特朗普，因為庫克指，根據法律特朗普就冇正當理由。

項莊舞劍，意在沛公，特朗普係咪要針對庫克？可能係，但根本原因應該就唔係庫克嘅個人操守或問題，而係聯儲局「唔聽話」，由特朗普上任至今，都差唔多半年，特朗普每隔一段日子就叫聯儲局減息，講咗半年都未減，以特朗普「順我者昌」嘅性格，冇可能會冇動作，庫克今次就「有幸地」成為特朗普針對對象，睇依家個勢，聯儲局之後應該都會減少少利息，不過亦唔會係特朗普所想嘅幅度。

減息與否，涉及比較複雜嘅經濟問題，減息、放水、刺激借貸同投資，一般嚟講係好事嚟嘅，不過，因為關稅戰影響，美國國內嘅通脹壓力都唔少，如果減息、刺激經濟同時又將物價推高，係好係壞，真係好難講；聯儲局未必係唔想減息，而係減咗可能美國仲大穫，特朗普以個人意志迫聯儲局減息，其實係雙面刃！

近期嘅特朗普，「沒有更瘋癲，只有更瘋癲」，讀者們可以睇下近期嘅美國新聞，特朗普政府「破天荒」地入股晶片商英特爾（Intel），近日又考慮入股國防承包商洛歇馬丁，然後，如果輝達及AMD將晶片出口到中國，又可能要將15%收入上繳畀美國政府。美國政府嘅財政理念，核心在於自由市場，推得極致啲甚至係政府完全不干預市場，依家特朗普政府玩入股企業、出口要分紅，筆者就算唔用「搶」呢個字，似乎係完全違背市場原則。

以往嘅美國總統或者政府，有冇在任總統尋求私利或者偏袒，當然有，但特朗普嘅玩法，似係完全扭曲市場甚至法治，例如是否減息，一向由聯儲局獨立決定，特朗普唔止係踩過界，更加係踩到上人哋心口；至於入股英特爾、輝達要分紅等做法，即係美國政府如果覺得有利可圖，就直接叫企業賺到錢分畀佢哋？唔知咩原因，特朗普非常渴望得到諾貝爾和平獎，但佢對外對內，都似係搞亂世界多啲，唔好講和平獎，其實美國嘅民主制度，都畀佢同啲前任搞到搖搖欲墜喇...