筆是機場｜人在英國　沒有示威的自由？

文/稀思路

唔少人對英國有嘅「刻板印象」，都係覺得英國、美國等西方國家，係有人權、自由、法治以至公義，但呢種「刻板印象」，可能係不正確嘅，因為英國等國家，正在一步步收緊自由，點解要咁做？美其名，當然係為咗公眾秩序，但如果諗深一層，其實係出於政治需要，之前因為英國經濟等問題，英國收緊公共秩序、示威相關法律；最近，英國有幾百名示威者被捕，原因係示威者被指支持「被禁組織」，合唔合理？筆者同讀者們一齊睇睇。

說話，上周六（9日）喺倫敦有民眾集會支持被取締組織「巴勒斯坦行動」（Palestine Action），英國大都會警察以示威被禁為由拘捕咗464人，另外有幾個人因為其他罪行被捕，警方表示，呢場行動係近十年來「單日最大規模逮捕行動」。本身嘅示威活動，由團體「捍衛我們的陪審團（Defend Our Juries）」組織，據稱有多達700人參與，幾百人高舉「我反對種族滅絕，我支持巴勒斯坦行動」等標語，之後警員進場，將示威者帶走，部分被捕者之後獲釋，但條件係不可以再參與支持「巴勒斯坦行動」嘅集會。

原來，英國喺7月初，就將「巴勒斯坦行動」列為恐怖組織，任何人支持或加入，可以判刑14年，有國際組織就批評，英國以《反恐法》拘捕大量示威者「令人深感憂慮」。到底「巴勒斯坦行動」係一個點樣嘅「恐怖組織」？根據路透社嘅介紹，「巴勒斯坦行動」組織指責英國政府參與以色列在加沙地帶犯下嘅戰爭罪行，組織部分成員此前曾闖入英國皇家空軍基地並損壞軍機，作為一系列抗議活動的一部分。今年7月，英國政府根據相關法律將「巴勒斯坦行動」組織列為被禁組織。

每個國家都要維護國家安全，筆者絕對明白，英國禁止「巴勒斯坦行動」嘅原因似乎係安全需要，而「巴勒斯坦行動」嘅存在，從根本而言係一個反對戰爭嘅組織，喺一個民主國家（英國）被定性為被禁組織，係咪合理，筆者相信讀者可以作出判斷；如果有英國民眾反對戰爭，支持反戰組織會被捕，又係咪合理呢？筆者喺新聞睇到，有示威民眾就高調批評英國警察「你們真可恥。」

根據過去資料，英國近年除咗通過咗新嘅國家安全法案，將「外國干預」定義為刑事罪行，過去20多年間，計埋較新嘅國家安全法案，其實英國已經至少10次修訂或頒布涉國家安全嘅法律，包括《2019年反恐法案》、《2015反恐和安全法案》、《2011恐怖主義預防和調查法案》、《反恐2008年法案》等，啲人成日話美國有唔少國家安全法律，其實英國「都唔少」喎。

早前，包括英國在內嘅美國、G7集團成員就批評香港特區政府通緝袁弓夷等喺海外搞「香港議會」嘅國安法疑犯，依家筆者睇返，英國嘅執法程度，係反戰組織、反對戰爭嘅民眾都會拘捕，咁相比之下，香港特區去通緝喺香港體制外自己搞「議會」嘅危害國安人士，係咪合理好多？有啲人以為英美有示威自由，但英國嘅例子似乎話畀我哋知，如果涉及國家安全或者一啲「政治因素」，西方國家都唔係好自由；筆者仲觀察到一點，就係一啲潛逃去英國嘅攬炒派政客，基本上去到英國，係完全唔會就國際事務、公義去發聲，呢班人，筆者依家睇返，只係「逢中必反，逢英必舔」！