甄子丹心噏電影行業低迷 籌拍西片將香港帶向全世界
【點新聞報道】甄子丹今日（14日）以「打吡大使」身份，出席在跑馬地馬場舉行的「香港打吡大賽2025」獲選參賽馬匹名單公布會，甄子丹坐着房車出場，並揮動旗幟公布14匹入選馬匹名單。入選馬主和練馬師逐一坐着房車出場與子丹合照，為本月23日假沙田馬場舉行的「香港打吡大賽」揭開序幕，子丹更透露將籌拍一部自導自演的西片。
被問及是否是動作片，子丹說：「我都唔想拍動作片，但冇法，哈哈！講笑啫！始終動作片係標誌，我唔去推邊個去推？我要做帶頭推動嗰個。」演員方面，他稱中外演員都有，女演員更需要識打。影片大部分都在香港和澳門取景，他說：「係我要求嘅，係雙贏，可以將香港帶向全世界，同時令香港電影同行有工開係好事。」
對於最近又有戲院結業，子丹指近幾年有多部電影如《九龍城寨之圍城》和《破·地獄》成績令人鼓舞，但其實整體電影行業低迷，上年只有20多部電影，同行開工的人很少，導致電影行業好艱難，認為舖租貴是主要因素。子丹坦言感到好心噏，看到觀眾少了地方去看戲，亦有電影無地方上映，有機會都想同有關方面表達意見，幫到就幫。
此外，子丹已連續13年擔任「打吡大使」，他認為賽馬是香港標誌性娛樂項目，很值得支持。拍戲時試過策騎、本身亦是馬主的他，其愛駒曾兩度贏得賽事，可惜他都不在港，笑言好想一嘗拉頭馬的滋味。
他說：「有次同太太一齊入場捧愛駒，但跑第二，係尾數上來第二，幾冇臉呀！好掃興，希望再接再厲，喺邊度跌低就喺邊度起番身，老婆叫我下次都係唔好再嚟。」子丹近日已抽到新馬，被問會否取名「宇宙最強」？他笑言：「做最強膊頭會好攰，世界邊有最強吖！叫『宇宙最開心』、『宇宙最健康』都唔錯。」
（點新聞特約記者陳惠芳報道）
相關閱讀：
