筆是機場｜持BNO人士要申訴？英國冇當你係自己人喎！

文/稀思路

喺筆者好細個嘅時候，正值一陣移民潮，移居英國、加拿大甚至澳洲等，係部分香港人嘅選擇；不過，唔少人最後都選擇回流，包括筆者一啲親戚，點解？最深層次原因，係無論香港人移民去邊度，始終都逃唔過「二等公民」嘅身份，除咗法律地位未必同本地人一樣，剩係生活同職場歧視都夠慘。最近，一批移英港人組織去聯合國「經濟、社會及文化權利委員會」（CESCR）申訴，希望能夠得到公平待遇，其實人哋都冇當你係自己人，公咩平？

話說，幾個移英港人去日內瓦，就BNO港人面對嘅困境「陳情」，睇返報道，佢哋喺英國面臨經濟、社會同文化權利障礙，呢啲障礙又加劇不平等，例如進入勞動市場遇上問題，包括資格認證唔到，學費又貴過本地人，而且社會保障亦唔係同當地人一樣。簡單嚟講，就係賣慘，希望得到平等對待。

報道講嘅嘢，其實已經相當客氣，網上有評論就直接話，對於呢啲移英港人嘅訴求，英國政府擺明hea佢哋，例如關於公共福利問題，內政部回覆，大約意思就係除非「開唔到飯」，否則唔好諗住有公共福利；至於學費問題，就話如果移英港人有咗定居身份，學費就會平啲。評論同時指出，喺英國尋求政治庇護嘅人，被延遲審批，唔准返工，有人就喺難民宿舍過住非人生活，但係英國政府一直愛理不理，繼續收緊關卡。

嗱，筆者作出評論，一向都係盡量做到公正，先講學費問題，移英港人攞住BNO留喺香港，嚴格嚟講，其實未有定居或永居身份前，係一個英國嘅「客人」（客觀觀察係咁），咁點可能去讀英國嘅大學等，可以同本地人一樣，享受學費優惠呢？情況就如有其他青年嚟香港，喺未有永居身份之前，大學學費以至公共福利，都應該唔會同香港本地人一樣呢！

至於資格認證等問題，其實每個地方有唔同做法，就算係接受相近嘅教育同專業訓練，都唔保證去到其他地方包括英國，人哋要承認移英港人嘅不同資格；容許筆者講句，外國市場包括唔同嘅專業市場，有少少排外完全唔出奇，香港人去到英國，如果諗住「專業人士繼續成為專業人士」，無疑係有啲一廂情願。

無論喺美國、英國以至歐洲部分地方，反移民根本係一種趨勢，如果有財有勢，外國可能仲會歡迎部分移民（嚴格嚟講係歡迎錢），但如果無財無勢，仲諗住去英國讀平書、享福利，唔好玩啦，移英港人真係以為英國對香港人好有感情？好有感情嗰個「末代港督」彭定康，最近都好似冇為「香港人」出聲喇！2019年黑暴時，英國高高舉起支持黑暴人士嘅旗幟，依家已經係2025年，英國政府「輕輕放下」要支持香港人嘅包袱，都係合情合理，冇得怨。