筆是機場｜特朗普趕走移民　逃美「手足」隨時要回港？

文/稀思路

有啲嘢，就算過咗去，嗰種恨係依然會記一世嘅，好似黑暴咁，明明係一班人用暴力破壞社會，偏偏話自己係「為香港」。唔知讀者仲記唔記得，黑暴期間，攬炒派政客以至暴徒們，視邊個為「最大救星」？嗰個就係特朗普！依家特朗普再上台，全力趕走移民，甚至逃美「手足」都可能隨時冇得留低，當初出盡力支持特朗普嘅人，依家喺美國又隨時冇得留低，有咩感受？

之前筆者寫英國比較多，原來美國嘅情況都值得關注。日前，資深傳媒人黎廷瑤有兩篇文章，正正就係講逃美「手足」，由於篇幅太長，筆者盡量長話短說，簡單嚟講，就係當年黑暴「手足」逃到美國後，因為上任總統拜登2021年實施「延遲強制離境」計劃(DED），酌情畀佢哋留低，但DED不等於居留權，拜登今年初下台前，仲延長過DED，咁啲逃美「手足」係咪穩陣，至少可以玩多兩年呢？情況又唔係咁。

首先一樣嘢，就係特朗普如果一聲令下，呢班人都係隨時冇得留底。而近日，赴美通緝犯郭鳳儀亦表示，自從特朗普上任後，美國政府網站對於DED政策係咪延續已經冇清晰說法，黎廷瑤就形容係利刃懸在逃美「手足」頭上。一個不祥之兆，就係特朗普已經推翻咗拜登一批委內瑞拉嘅非法入境者「臨時保護」，將佢哋全部遣走，佢哋情況、身份又同逃美「手足」相似，下一輪會唔會到逃美「手足」，真係好難講。

如果特朗普決定終止DED，呢班逃美「手足」會點？假若佢哋有其他國家簽證，當然就係去其他國家啦；如果冇，都有可能會被遣返香港，當中有人有案在身，到時真係要「找數」。可能讀者會問，點解呢班逃美嘅人唔申請政治庇護？答案好簡單，就係難申請，有人4年前到美國，到今日連「面試」機會都未有。

之前筆者已經唔止一次寫過，基於2019、2020年時中國內地、香港特區以外有個氛圍，就係西方國家既然要搞中國，當然要支持喺中國香港搞事嘅人，所以由美國、加拿大到英國，都有唔同嘅接收香港黑暴分子計劃；但係呢，此一時，彼一時，當呢啲國家同中國關係變好，或者內部出現反移民等狀況時，呢啲移英、逃美嘅人，係咪仲可以一世獲得保護？當然未必，要怪，就只能怪自己當初錯信攬炒派政客，令自己走上不歸路。

黑暴時以至之後，外國對待黑暴參與者，完全係差別對待，有名有姓嘅，出名嘅，要庇護或者申請外國居留權，容易好多；無名無姓無人識嘅，去到美國無正式居留權，難搵工作，冇錢讀書，買唔到保險等等，分分鐘出咗意外都冇人理。當初，攬炒派陣營話要齊上齊落，依家好多人「落」（落難）喇，佢哋嘅同路人，包括已經喺外國風流快活嘅，又有幾多願意向「手足」伸出援助之手，而唔係停留喺「用口支援」階段呢？參與黑暴係錯，唔承擔責任係錯，當特朗普係神咁拜，就更係大錯特錯！