筆是機場｜民主黨就敗在許智峯這一輩手上

文/稀思路

近期有唔少新聞、評論分析民主黨宣布解散一事，唔同嘅觀點，筆者都睇過唔少，最為主流嘅講法，莫過於本身係「和理非」嘅民主黨，由非法「佔中」開始靠攏激進派，結果越踩越深，最後返唔到轉頭，落得被社會遺棄，最終要啟動解散程序嘅下場。如果我哋將個說法講得再精準啲，其實民主黨就係敗在新一輩包括國安逃犯許智峯等人手上，當初佢哋越走越激，又帶住民主黨上上下下「齊齊激進」，「和理非」變「勇武派」，令民主黨完全失去本身價值，今日香港唔再需要激進派，當然亦唔需要變埋做激進派嘅民主黨啦。

之所以特別提到許智峯，係因為身在澳洲嘅佢，喺面對傳媒時，講咗一大輪風涼話，包括聲稱前黨友受「政治壓迫」、「民主黨代表着一個最老牌的溫和政黨」、「連民主黨都容不下」等等，仲話民主黨無法繼續運作，「一定係香港人嘅損失、亦都係政權自己嘅損失」。憶述黨內時光，許智峯感激遇見司徒華、李柱銘、何俊仁同涂謹申等前輩，話自己學會「堅持價值、排除困難」。講咁多嘢，許智峯有冇諗過，其實係佢有份背離民主黨價值，將民主黨帶到地獄呢？

許智峯係過去十年民主黨激進化嘅表表者，做區議員時，已經「破格地」喺區議會搞所謂抗爭，黑暴運動期間，許智峯、鄺俊宇以至林卓廷等人，「最常見做法」就係喺暴徒前面「遮風擋雨」，以談判、交涉為名，實際係為暴徒換取後退甚至係撤退空間。當許智峯話「民主黨代表着一個最老牌的溫和政黨」時，說法只講中一半，民主黨喺無畀佢哋一班激進派主導時，民主黨的確係溫和政黨，但係當許智峯之流有份帶領民主黨走向激進，民主黨唔再係咩溫和政黨，而係一個注定被社會遺棄嘅激進組織。

無論民主黨喺黑暴後表現得幾溫和都好，由非法「佔中」到黑暴運動，民主黨都係主要參與政團之一，呢一點政界冇忘記，市民亦都冇忘記，喺度，筆者想分享兩個小故事，佐證民主黨一步一步走向激化嘅先兆。2010年特區政府嘅政改方案通過，當年嘅所謂七一遊行，反對派支持者連民主黨元老司徒華都鬧，言語仲相當之惡毒；幾年後香港再討論政改，民主黨另一元老李柱銘曾表示接受提名委員會先挑選特首參選人嘅建議，但之後迫於壓力，反口話自己「受到批評，批評合理，決定收回意見」、「並向民主派和及長期支持者致歉」。

司徒華又好，李柱銘又好，多多少少都代表住民主黨舊一派或元老級人馬理性嘅一面，但係，民主黨之後堅持唔到「和理非」，筆者成日都覺得， 民主黨（以前）嘅可貴之處，就在於那怕係受壓，至少都堅守非暴力、和平、理性等原則，新一代上場喇，同公民黨甚至社民連等鬥激，咁民主黨唔係「和理非」，激進派又覺得佢未夠激，「非驢非馬」嘅民主黨，代表邊個光譜，代表邊一類市民，又仲有咩生存價值？

時光唔可以倒流，就如許智峯禍港惡行唔會改變一樣，當初民主黨一步又一步走向激進，其實呢個轉向，先係令到民主黨今日走向終局；反對派中人歸咎於政府、政界「唔多理」民主黨，但民主黨嘅人以至民主黨前成員有冇認真諗過，今日嘅民主黨，係本身嘅支持者都唔理佢哋先真。社會發生嘅事都係有因有果，當初選擇激進，就預咗會被社會遺棄；喺民主黨嘅高峰時期，有成19名立法局議員，曾為「香港第一大黨」，但就好似一個企業咁，一個錯嘅方向、決策，足以致命，民主黨嘅命運亦係一個啟示，依附暴力、破壞社會嘅組織，點可能可以繼續發展？時代淘汰嘅唔止係民主黨，而係暴力破壞社會嘅不法思潮。