移英家庭上演不倫鬧劇　淪社區笑柄執包袱回流

【點新聞報道】移英夫婦爆出軌，都唔係新鮮事。最近有移英港人在網上爆料，指有一名人夫與一名移民媽咪搞埋一齊，最終因send錯肉麻短訊被斷正。不倫事件在整個社區通晒天，人夫可能覺得冇面見人，舊年暑假一家已靜雞雞執包袱回流香港。樓主直斥對方拍拍屁股走人，但就「搞到香港人個朵臭晒」。

該名移英港人在社交媒體上一個移英港人群組發帖，大爆該社區一間學校有「移英港人出軌」，指「有對夫婦老公叫A，老婆叫B，佢哋一有BNO計劃就過咗英國中部某城鎮落腳，同我哋一家住埋同一區算係大家有個照應。點知上年年頭，B竟發現老公同另一個移民媽咪C女搞埋一齊！」

整件事要由前年聖誕節學校舉辦的「工作坊」講起，樓主指，「當時A同C女都係家長義工，一齊整吓手工嘢咁。跟住兩個人發展快過d膠劇，先喺家長whatsapp群私下add對下，美其名為『交流煮港餸心得』。點知轉頭就變咗半夜三更send語音：『你知唔知邊度買到正統XXX？』跟住就約埋去中超扮『偶遇』!」

正所謂上得山多終遇虎，「有晚A沖涼時，C女send錯肉麻message過嚟跟住秒速撤回，但已經俾人妻B截圖cap到正！」其實，人妻一早已發現唔到路，因為老公突然轉咗手機密碼，仲成日話要同「Bob」去睇波(後來先知 Bob係C女花名)。

不倫事件在整個社區通晒天，就連英國當地家長都食花生，「最抵死係班英國白人家長食埋花生拉住我屋企人細細聲問：「Are they practicing some new Chinese drama?」。樓主指，「最後可能A同B兩公婆覺得冇面見人，舊年暑假靜雞雞執包袱回流香港，但就唔知C女個邊點收科。」

樓主慨嘆：「我都明出軌度度有，但係你哋搞完一大輪就走咗去，搞到香港人個朵臭晒，我其實都係想簡簡單單喺英國識個另一半啫。」有網民則留言揶揄「一早講過啲家長群組先係最敗壞倫常」、「咁都畀A同B諗到用呢招做藉口回流香港離開uk園」。