58場《香港式離婚》落幕 黃子華分享幕後讚劉嘉玲值10000分
【點新聞報道】黃子華、劉嘉玲、楊淇、楊詩敏（蝦頭）、梁浩邦及趙伊禕主演的舞台劇《香港式離婚》，假香港演藝學院一連58場演出，於昨晚（23日）圓滿落幕。黃子華、劉嘉玲連同一眾演員、編劇、導演及監製王耀祖、周怡、黃懿雯一同謝幕，現場掌聲如雷。
黃子華感謝台前幕後工作人員，提到舞台劇需要大量人力物力，全賴大家每晚盡心盡力，加點運氣，才能順利演出。他感觸說：「我晚晚都想多謝呢個人，我今（昨）晚一定要講，就係我隔籬呢位劉嘉玲小姐。我哋第一次合作，講真你哋要我評價劉嘉玲，滿分係100分，我會畀10000分。」
劉嘉玲聞言後驚訝不已，即擁着子華道謝。子華指嘉玲為了這次演出，付出了極大心力，令人敬佩，不僅節食減8磅，還刻意限制自己少飲酒，他說：「我哋幾個演員，個個都病過，除咗佢。」子華笑說每晚演出後，演員們聚在他的休息室喝威士忌，但酒量比他強數倍的劉嘉玲，為保持最佳演出狀態，都忍住只淺嘗幾口。
子華大讚劉嘉玲：「我哋做演員都鍾意改善自己嘅戲，但改善到某個地步，都會心諗『唔好搞我啦，導演，畀我自由發揮啦。』我記得最後排練嗰日，黃詠詩仲畀張紙我，我即刻崩潰：『我唔識做喇！最後一日你仲要我改？』但劉嘉玲就唔同，由第一日開始到最後一日排練，每日都不停問：『冇Notes畀我嘅？畀多啲Notes我啦！』佢真係不斷追求進步，同時又好自律。」
子華又分享即使演出如火如荼、大家累透時，劉嘉玲仍然抽時間為每個人準備聖誕禮物。說到這裏，子華忍不住讚嘆：「呢個咩演員嚟㗎？」然後再補充：「所以無論台前定台後，佢都值得10000分！」子華轉頭對編劇黃詠詩笑說：「你好難再搵到咁強嘅Laura喇！你個戲以後會唔會再重演？好難，因為嘉玲帶住佢幾十年喺銀色生涯累積落嚟、不能言喻嘅實力去演呢個角色。呢啖Laura味，你喺香港真係搵唔到第二個。」可見劉嘉玲飾演的Laura深深烙印在子華心中，其魅力與深度，令他印象難忘。
子華再次提到這次合作的緣起：「喺最後決定嗰刻，好似有個雷公『嘭』一聲同我講：『劉嘉玲，好喎！』呢個真係『神』嘅選擇！多謝你，嘉玲，令到我哋成個團隊都咁愉快！」
嘉玲亦感激子華這個「神」的指示，她笑說：「好多謝子華搵我做呢個戲，由綵排到𠵱家4個幾月，我經歷咗一段好美妙嘅時光。我唔係專業舞台劇演員，所以一路都追住導演畀Notes我，我唔想拖累成個戲。」她感觸地說：「其實呢4個幾月對我嚟講，好似一場禪修。我要學識點樣活在當下，我一路都喺度學緊，我要活好當下。每次出台之前，我都會提醒自己，乜嘢都唔好諗，集中精力，喺台上感應到啲咩，就盡情發揮出嚟。呢段時間對我嚟講好特別，我會好珍惜，係我一生中好難忘嘅經歷。」最後，嘉玲不忘再次感謝團隊的努力，並向所有入場支持的觀眾深深致謝。
此外，這晚林青霞和劉德華前來捧場。嘉玲對於劉德華的到來也大感驚喜，雖然她在社交平台只簡單寫上「Surprise😍 @andylauox」，但字裏行間也感受到那份激動。同時劉嘉玲也分享了兩張與劉德華的合照，其中一張她更攬實劉德華，如小鳥依人般地與對方頭貼頭，可見大家關係密切，有網民留言這就叫做：「真朋友！」
（點新聞特約記者陳惠芳報道）
相關報道：
