綜合移英回流港人15特質　網民嘲：窮、大洗、無腦

【點新聞報道】當初不少港人人云亦云，一窩蜂移民去英國，點知幾年下來，荷包乾塘、捱又唔得、talk又唔得，回流返港成為唯一出路。有參與輔導移民回流人士的網民發文，綜合了移英港人敗走的15個特質，有網民看後更抵死歸納成「窮、大洗、無腦」。

有網民日前在社交平台Threads發文，表示自己一路有參與關於移民後回流的輔導工作，並綜合了幾十個個案後，得出求助人多個特質，包括：經濟狀況比較緊，但自己唔承認；數學唔好，對數字唔敏感，錯估自己仲有好多錢；比較需要靠香港食物，電視節目嚟維持情緒穩定；自律性低，有拖延症，唔踢就唔郁；唔可以獨立生活，做咩都要人陪；鍾意比較，但唔面對現實；無耐性，三分鐘熱度，未見有成果就放棄；危機意識低，到真係無晒錢先意識到要搵錢；外語能力唔好，又唔努力學；冇自信，做咩都發揮唔到100%實力；冇錢但多嗜好；愛幻想，不切實際；鍾意圍返香港人堆圍爐取暖，長期停留喺空談階段，講是講非，浪費時間，及對移民有太高期望，以為換個地方就可以換個人生，忽略咗現實情況。

當然還有一項必不可少的就是小朋友。樓主指有小朋友的家庭會回流，沒有小朋友的家庭留得低的比率高好多。他進一步解釋是指「好多朋友回流後表示如果剩係兩個大人，可以死頂落去。多咗小朋友就唔係剩係大人嘅問題，要處理同安排嘅嘢多咗好多。」

樓主強調，自己沒有存在任何偏見，「上面講嘅特質100%係由當事人返到香港之後『自觀』地睇返喺外國時候嘅生活再講返出嚟」，而且其印象中沒有人因回流而冇晒自信，但「唔甘心、放唔低嘅就大把」。

原以為回流的人士會學乖了，誰知樓主透露，其接觸的個案中有約70%表示打算儲幾年錢二度移民。樓主就會問一句，「有冇信心再試一次唔會犯上次嘅錯誤？」好多時對方只對望而笑，樓主認為，「因為大家都知道發現到有問題，唔代表可以下次再做嘅時候可以100%避免。」