筆是機場｜美國四圍挑火頭　中國只需做一件事？

文/稀思路

1月20日，特朗普再次宣誓成為美國總統，由佢正式上任到依家，如果要用一個字去形容，就肯定係「亂」喇！特朗普一上任，就講到好似「全世界都係佢嘅」咁款，格陵蘭要搶過嚟，巴拿馬運河又應該係美國嘅；跟住加拿大可以係美國「第51個州」，加拿大以及墨西哥甚至中國，又可能要被加徵關稅。特朗普嘅作風，擺明就係恃強凌弱，但觀乎加拿大、墨西哥以至中國嘅反應，要隨便欺負其他國家？無咁容易喇，筆者都覺得，只要中國靜待時機，美國搞亂自己，一切都會更好！

前幾日，筆者喺網上面睇到篇文章，主旨係「未來4年，中國只需幹一件事」，文章分析特朗普再次上台，喺歐洲、亞太、中東等地緣政治嘅舉措備受關注，例如喺歐洲，美國明顯唔太在意俄烏衝突以至烏克蘭，特朗普嘅政策重點，似乎就係點樣「收割歐洲」。讀者們睇下近期嘅美歐新聞，其實特朗普都可能想對歐盟國家加徵關稅，如果成真，即係美國最大盟友（除咗英國）歐盟，同美國嘅合作關係肯定大不如前。

至於亞太地區，美國盟友日本、韓國對華態度都出現咗變化，只要能夠進一步削弱美國陣營嘅力量，喺特朗普玩緊戰術後撤嘅契機下，中國可以爭取歐洲以至日韓態度轉變；通過巧妙嘅外交策略同合作措施，加強唔同地區嘅合作，喺國際舞台上拓闊空間，為中國喺全球發展創造有利條件。

呢篇文章嘅主旨，其實好簡單，就係「等美國搞衰自己」，文章大約係一星期前發布，筆者覺得一星期之後嘅今日，情況又已經唔同咗，例如特朗普未上台就開始針對加拿大、墨西哥，點知兩者都對關稅大力反擊，例如加拿大就決定反向對美國商品徵收關稅，同仇敵愾嘅加拿大人，甚至主動表明要杯葛美國部分產品；墨西哥亦有計劃向美國輸墨產品加徵關稅。本來十分「英明神武」嘅特朗普政府，被迫暫緩向加、墨徵收關稅。

中國作為世界第二大經濟體，當然亦唔會對美國嘅關稅手段示弱，中方日前就迅速宣布反制措施，包括針對美國煤炭、原油、液化天然氣、農業機械、大排量汽車、皮卡等6類商品加徵關稅，並對鎢、碲、鉍、鉬、銦相關物項實施出口管制；同時，中方對谷歌展開反壟斷調查，並強化監管，將美國PVH集團和因美納公司列入不可靠實體清單。有專家就指出，中方反制措施起到警示作用，如果美國一意孤行，中方會毫不猶豫採取更有力反制措施，等美方付出代價。

從美國層面嚟講，部分選民覺得前總統拜登「做唔到嘢」，唔夠Tough（硬淨），所以大部分人投票支持特朗普再上任，但係特朗普似乎一上台，喺國際舞台上就唔係同人打技術，而係玩霸王硬上弓，想去搶格陵蘭，又想搶巴拿馬運河，甚至上下鄰國（加拿大、墨西哥）都成為開刀對象；加上中國、歐盟隨時都會被美國針對，驟眼睇，美國有少少似喺度向全世界宣戰先真喎！如果特朗普上任未夠一個月，就可以製造咁多敵人，過多一年半載又會變成點？筆者就認為，選擇盟友，最好都係選擇有實力又以誠待人嘅好，若然美國都唔當盟友係一回事，歐盟、加拿大、日本、韓國等，不如考慮下點樣同中國修補關係，總好過一邊睇美國面色做人，仲要一邊畀美國搞啦！