香港人呃香港人！移英港女呻帶貨被走數
【點新聞報道】英國移民圈又爆出香港人呃香港人！有移英港女新年期間，好心返港幫人帶貨，回英國後竟被走數，涉款約600鎊，大呻「香港人講個信字，最後原來真心欺騙」。
該名移英港女在社交平台發fb群組「英國香港人生活交流區」發文求教，指「新年返香港幫個朋友嘅同事買嘢返英國，帶返英國寄畀佢啦，全部有單據，點知佢收完貨之後到宜家都唔找數，成6千幾蚊港紙，差唔多600鎊」。在追索無門下，惟有發文求教同路人，「我知地址同電話，有冇可能搵到英國嘅收數公司收？」
不過，有網民質疑「唔明點解唔收錢先寄」、「你點肯定他有收到貨，幾千蚊當交功課」，樓主就回覆指，「淨係得對話訊息，講真真係講個信字，冇諗過咁PK走數。」
正所謂「冤有頭，債有主」，不少網民認為樓主應找朋友幫手，「你應該搵你朋友幫手」、「朋友有責任，如果朋友都唔理，呢個唔算係朋友了」、「開佢名囉」，但樓主回覆指「因為我朋友話佢冇做，所以先麻煩」。
有網民則建議應訴諸法律，可以求助「Small Claim Court（小額錢債審裁處）」，指私人收數公司一般要有法庭判令先會提供協助。
