紅館開騷一定要靚 慧嫻華麗長裙踏五吋高鞋台上仆倒
【點新聞報道】陳慧嫻40周年演唱會《The Fabulous 40 Priscilla live in hong kong》昨晚（21日）假紅館展開第一場演出，慧嫻將會唱六場，最後一場為大年初二與歌迷歡渡新歲。昨晚英皇集團董事會主席楊受成及夫人、李克勤及太太盧淑儀、毛姐及老公現身棒場，張敬軒更擔任首場嘉賓。
花開花落人生無常
今次演唱會主題是「花期」，昨晚opening慧嫻被一朵巨形大花包裹出場，一口氣唱了多首經典歌曲，繼而向觀眾打招呼，「嗨！冇見大家九年啦！ 時間過得好快，我記憶緩慢，覺得好似過左三年，啲人話中過Covid之後，記憶會差，我係咪愈來愈差？哈哈。今次演唱會係講花期，花開花落人生無常，希望大家用心聽歌，明白整個主題。」
記憶變差需拍照片
慧嫻又講到回憶，話自己以前唔鍾意影相，「所有嘢記係腦中就最好，但係發覺年紀愈來愈大，好多嘢我都唔記得咗。依家反而鼓勵人影相，可以記番好多回憶。人記憶入面一定有開心同唔開心嘅事，好似我咁，我9隻貓已經死曬，呢個記憶真係好創傷，你哋又有冇試過曾經後生有一個伴侶，好鍾意你，但係你又冇好好珍惜，最後分咗手？所以每日都要話佢知我愛你，關係先會長久。」歌迷聽到之後就不停對着她大叫：「我愛你啊！」
軒仔合唱「跳舞街」
到跳舞歌環節，慧嫻《跳舞街》唱到一半，軒仔突然升上來，人人企起身跟住跳，紅館成了跳舞街氣氛熱烈。慧嫻大讚軒仔是一個好尊重前輩好提攜後輩的人。軒仔又指二人是同公司，但論資排輩，一直唔知應該點稱Priscilla，叫慧嫻姐姐好？定...」陳慧嫻即謂：「阿嬸、Auntie...哈哈，梗係叫我Priscilla啦！你呀，你要多多提攜我添呀！」嚇得軒仔馬上跪地，引得全場大笑。
兒時偶像感覺奇妙
軒仔獨選了《與淚抱擁》獨唱，他表好開心，好榮幸可以Priscilla舞台上面表演。他已睇過無限次慧嫻姐姐「幾時再見演唱會」，能夠以一個歌迷身份企係舞台上面唱佢嘅歌，生命安排真係好奇妙，「在我讀書年代，她每一首歌都陪住我做功課，我諗來諗今晚揀咩歌唱比大家聽，我揀左以下佢冇揀的一首歌《與淚抱擁》。
手機燈海開心感動
慧嫻曾經表示，非常希望擁有紅館的手機燈海，因為以前手機沒有現在先進。她選唱《陪伴》時，就見到全場亮手機燈，令她又感動又開心，她又表示，「其實有很多人都同我講過，如果你當時冇去讀書，可能你的事業會更加好。但係呢個只不過係一個假設而已。可能唔係呢？其實，我已經好幸福。我覺得我依家擁有嘅嘢，我已經好滿足。特別係我擁有你哋嘅陪伴。係呢四十年裏面，擁有你們俾我嘅愛。無論你哋係佛遲加入，或者係一早已經加入，我都好感謝你哋。」 然後為觀眾獻上一首自己深愛的英文歌《I Need To Be In Love》。
未知何時再會泛淚光
演唱會來到尾聲，慧嫻被全晚觀眾熱情感動得閃着淚光，「作為一個歌手，我嘅天命，上天派我落嚟呢個地球係為乜？作為一個歌手，做好我嘅歌，可以用我嘅歌，去幫助大家，在感情上有傷痛時侯，可以療癒，可以療傷，亦都可以鼓勵到大家的人生。大家都知道今年本身應該有「兩蚊」，我相信佢認為我唔需要「兩蚊」住，係咪延遲左改變左計劃？哈哈。年紀愈來愈大啦，我真係唔知下次幾時再係紅館開演唱會啦，甚至會唔會重開呢？如果你哋要我再開，我未必可以跳到跳舞街喎，咁係咪你哋答應我，你哋跳？我唔知道幾時重會再見到大家。」
不慎跌倒反應夠快
慧嫻腳整晚腳踏5吋高跟鞋步步為營，唱《明日有明天》後，穿上華麗長裙的她準備同觀眾說話時，疑踩到裙腳，失重心向前跌倒。身經百戰的她即時十分有型坐在地上擺個靚甫士並表示：「我覺得咁樣幾靚！」而音樂總監何秉舜見狀即時走上前扶起慧嫻，慧嫻起身後對何秉舜笑着說：「係咪呢，終於衰喇！都話咗唔好講自己靚，都話靚完之後就唔靚。」
（點新聞特約記者陳惠芳報道）
相關閱讀：
