2025風生水起｜黎耀祥蛇年工作旺　蕭正楠被批拗交難贏老婆

【點新聞報道】一共十三集賀年節目《2025風生水起》，明晚（20日）推出。節目由薛家燕、胡美貽、莊子璇、徐文浩擔任主持，首兩集邀來視帝黎耀祥和準星爸蕭正楠擔任嘉賓。

明晚首集麥玲玲師傅主持的「開運搵師傅」，邀得視帝黎耀祥擔任嘉賓，現定居內地中山的祥哥，去年因經常拍片介紹大灣區美食，被家燕姐封為「美食KOL」。玲玲師傅指祥哥嘴形及牙齒生得靚，代表「食祿好」，又指以祥哥面相，應不是一個會應酬的人，祥哥聞言即回答：「係呀，唔多應酬，基本上冇應酬。（係咪都唔飲酒？）少少啦，飲酒其實係食嘢嘅文化，鋸個扒有杯紅酒飲吓，味道都唔同。」

玲玲師傅續指祥哥蛇年名氣運佳，宜演偏鋒角色兼且工作機會多，不過由於祥哥屬「弱水」，玲玲師傅建議他到較寒冷的地方工作有助運程，家燕姐聞言乘機邀請祥哥到美加登台。提到太太梁耀蓮（Julia）擔任其經理人，胡美貽問祥哥平時是否由太太話事，祥哥盡顯廿四孝一面冧笑說：「男人邊有得話事架！」第一集還有「開運行街街」環節，由李丞責師傅帶領一眾主持到大角咀必發道攞好意頭。

後晚（21日）播出的第二集，邀來準星爸蕭正楠擔任嘉賓，阿蕭透露目前心情「戰戰兢兢」，皆因擔心太太黃翠如的情緒起伏：「要留心聽佢講嘢情緒有冇起伏，冇嘢就冇嘢，有嘢就知自己有嘢做得唔好。」

阿蕭自認是傳統的人，以前會幻想如果生的是兒子可以一起玩樂、做運動，但後來因漸漸受到身邊朋友影響，才驚覺生女的樂趣也很大：「見到洪永城或身邊同事生咗女都非常之冧，所以好矛盾！」家燕姐遂追問翠如喜歡仔還是女，阿蕭對此未有正面回答，更鬼馬地說：「佢鍾意我囉！」玲玲師傅續指屬蛇人士較含蓄，而阿蕭與BB同樣屬蛇，故性格似容易相撞；相反翠如屬雞，與蛇相合，並指屬雞人士較直率，玲玲師傅更謂：「拗交好難贏到雞，所以相對係翠如話事。」

（點新聞特約記者陳惠芳報道）