筆是機場｜杜魯多係畀特朗普搞走嘅

文/稀思路

之前筆者寫文講過，同美國做盟友，尤其係特朗普治下嘅「盟友」，係要認「契弟」先得；好似加拿大咁，明明係美國長期嘅鐵桿盟友，但特朗普未上台，就已經話要加徵加拿大巨額關稅，仲話叫加拿大總理杜魯多（剛辭職）做「加拿大州長」，搞到杜魯多完全無晒面子；周一（6日），杜魯多宣布辭去自由黨黨魁同總理職務，從遠因去睇，係因為杜魯多任內出現諸多問題，但導火線，筆者覺得就係特朗普擺明落加拿大面，而杜魯多又毫無還擊之力，內政同外交都唔掂，唯有執包袱走人。

特朗普嘅外交手段，其實已經唔係用常理能否判斷去形容，而係「嘩，可以咁講嘢？」未上任，就對加拿大落重藥，話要大幅加徵加拿大關稅，甚至將美國毒品問題都歸咎於加拿大；然後，又因為私怨叫杜魯多做「加拿大州長」，即係話加拿大「屬於」美國嘅，杜魯多無還手之力，就強調「特朗普講笑啫」、「我哋係主權國」，你以為人講笑，但特朗普確實係送咗杜魯多一程，特朗普最新嘅社交帖文，其中一張圖就係將加拿大「畫入」美國範圍，認真係「笑人笑到底」。

我哋講一個國家內憂外患，通常就係講內政同外交，內政筆者一陣再講，加拿大其實唔算好大問題，杜魯多都弱勢地執政咗一段日子，但外交出問題，尤其是加拿大同美國外交出問題，特朗普嘅「口舌之攻」，係直接了結咗杜魯多；相反地想，如果特朗普當選總統後話要同杜魯多合作解決雙邊問題、減加拿大關稅，就算杜魯多話想唔做，加拿大啲政客都要留住佢啦。

從外表去睇，杜魯多樣貌、談吐都似做高級官員，其實佢任內已經出過唔少問題，例如2016年，就試過接受富豪嘅豪華假期款待，被裁定違反咗聯邦利益衝突法；2020年委託慈善團體去執行資助受疫情影響學生嘅計劃，個慈善團體又被爆出畀錢邀請杜魯多嘅母親同弟弟去演講。如果喺香港，呢啲唔係叫違反利益衝突法，可能叫貪污喇！

講開又講，一些亂港分子對限制出鏡、緊急法「好敏感」。殊不知其他國家或地區在此方面只會更加嚴格。2022年新冠疫情時，加拿大有司機因為不滿政府強制打疫苗而示威，跟住「佔領」渥太華同邊境口岸，杜魯多就引用緊急狀態法禁止公眾集會同限制出境，據講係該國首次實施該法。

不過，勢估唔到，衰咗咁多次嘅杜魯多都「死唔去」，偏偏就係特朗普直接或間接送咗佢一程，佢哋嘅恩怨筆者之前講過，筆者喺度提供多一個例子，就係2017年，特朗普向以回教徒為主國家頒布入境禁令，而杜魯多就表示歡迎回教徒，仲批評特朗普嘅做法。依家特朗普再上台，到底係針對加拿大，係針對杜魯多，定係兩者都針對，筆者唔肯定，只係估唔到特朗普未上任就劏出嘅「第一滴血」，竟然係來自自己鄰國；杜魯多之後，特朗普會向邊個盟友動手？真係好難估！