智霖唔慣講粗口 鎮宇教兒謹防《誤判》
【點新聞報道】張智霖及吳鎮宇這對好友，於甄子丹任監製及主演的新片《誤判》再度合作。
張智霖表示在拍攝現場，見到吳鎮宇就會很安心，因為一定會有很好的伙食。講到吳鎮宇於戲內，有一場單挑宇宙最強甄子丹的戲份，鎮宇原來是為大家發聲：「咁你知道甄子丹一向都係宇宙最強，一個打十個㗎啦！但係今次佢喺戲裏面就做檢察官，啲觀眾都好想見到你畀人打㗎喎！咁佢喺戲裏面，都係一個普通人嚟㗎嘛！點解唔可以畀人打呢？佢聽到我話咁想打，佢咪畀個機會我打佢囉！我梗係唔敢咁大力打過去啦！我哋冇練過武術嘅，驚佢震返我轉頭，骨裂呀！」
張智霖今次的角色亦有一定的難度，因為要在幕前講粗口：「平時講嘢當然會有某程度嘅語助詞啦！但在幕面前講粗口我就比較少啲，好容易會將啲語助詞，擺落唔啱位度，就會好唔舒服！呢樣嘢吳鎮宇就講得非常之好，講得好好聽之餘，仲要好冇攻擊性添！」
在片中有幸和一些前輩級演員合作，鎮宇表示好開心可以和汪明荃做對手戲：「其實久唔久都會見到阿姐，佢見到我會話，嘩！乜你咁大個㗎喇！其實佢畀面唔用個老字啫！另外同許冠文用同一個化妝間，就可以知道佢嘅私生活係好檢點……哈哈！講笑！講笑！我發覺佢對所有事物，都仲有一個好奇心，好似好耐冇出到市區咁，乜嘢都會問，乜嘢都會驗！」
期間鎮宇回想起自己小時候，曾經被父親未審先判：「個感覺係非常之唔舒服，我平時係曳，但係嗰次真係唔係我錯，所以而家對於我個仔，好少會有咁嘅情況發生，因為如果誤會佢嘅話，佢個反應會好大！如果佢真係有錯嘅話，佢就會搵藉口輕輕帶過！」
（點新聞特約記者陳惠芳報道）
相關報道：
