《破地獄》慶功楊受成送大禮 許冠文獲絕版名錶 子華20萬紅酒驚被劫
【點新聞報道】英皇電影《破‧地獄》票房已破1.4億，榮登香港華語電影最高票房第一位。昨晚（23日）筵開80席「破‧紀錄千人慶功宴」。集團主席楊受成犒賞三軍，導演陳茂賢及全體演員獲一枚金牌外，楊受成更向許冠文及黃子華送上大禮，出手闊綽。
許冠文收「綠水鬼」
楊受成送許冠文一隻絕版名錶、有「綠水鬼」之稱的綠圈Rolex Submariner，事緣有次許冠文跟老闆食飯，自言戴住一隻價值50元的深圳錶赴會，結果被楊生笑罵：「你唔好話識楊生，我真係冇面同你做朋友，戴隻咁嘅錶。」楊受成送出這枚私人珍藏，炒價接近20萬。許冠文更自爆當時有反問楊生：「你又知我隻錶平？」楊生便風趣回應：「我賣豬肉㗎？香港鐘錶大王呀。」
子華收逾20萬紅酒
至於黃子華，就獲楊老闆贈絕版名酒，20萬起跳嘅Domaine de la Romanee-Conti，子華笑言貴到唔捨得開嚟飲，又怕放在家中會被打劫。楊老闆就提議他生女時可以飲。
黃子華表示，希望票房繼續升：「𠵱家係值得慶祝下嘅時間。（有指長版本過年上映？）係呀！好癲，唔係新年，係農曆新年搞破地獄。」許冠文亦表示沒有問題：「好睇咪得囉！」
影片賀歲期無禁忌
黃子華續說：「之前未上映，我都覺得賀歲得唔得呀？但呢套戲大家接受程度，係部戲主題不單止百無禁忌﹑係每一日都係最好嘅一日，冇所謂賀歲，希望做到清明。（同其他賀歲片爭？）做咗另一個Level嘅笑片。」許冠文則說：「啲觀眾覺得好睇感人就得，未必一定柴娃娃。」
他們希望再合作拍喜劇，許冠文說：「同觀眾有交代，幽默感喜劇，但唔係以前嗰種，觀眾唔需要咁瘋狂，要Make sense有意思，唔使一分鐘笑一次，一分鐘喊一次都得，只要故事掂及夠料。《破‧地獄》對創作組嘅人好大啟示，重新諗過所有嘢，我哋要新嘢，未必要以前咁嘅嘢，度掂佢，唔介意笑，但未必瘋狂咁笑，要有意思嘅，觀眾而家太聰明。」
人人有高山低谷
子華表示：「部戲成功，因為真係直視我哋好多人有嘅『地獄』，每個人都有高山低谷，我哋搞喜劇，面對高山低谷嚟做，引起大家共鳴，部戲畀我哋教訓好好，關顧番我哋感受，快樂唔快樂﹑高山低谷。」
許冠文盼2025年香港人本身可以「破地獄」，可以重新再來；電影在內地﹑台灣及馬來西亞都有不俗票房，子華說：「同埋咁嘅主題，滿足感雙倍。（想邊度上映？）最好非洲人都可以投入。」
另外，楊受成與導演陳茂賢受訪問時坦言非常開心。黃子華在競猜票房遊戲上首先出局，楊老闆笑言抵打籮柚。「佢一早睇得好淡，6000萬呀。（係5300萬）5000添咋，哎呀！抵打籮柚。我都保守，我話最多最多睇1億，真係喜出望外。」導演陳茂賢自己對票房也是保守：「我係估5500萬，唔係冇信心，係願意輸，輸咗可大家請食飯更加開心。」
至於會否原班底再開續集或新作品，楊受成會否繼續投資？老他說：「佢哋三個（黃子華、許冠文、陳茂賢）我一定肯投啦，唔畀我投，反面呀！呢啲梗係聽導演講，導演話開我一定開，我睇佢。」
對於楊受成早前承諾送樓給導演，問到何時可以揀樓，楊受成再派定心丸：「層樓我哋一定搞掂佢，只要導演肯要就得。」至於其他演員又會有何獎勵？「佢哋而家傾緊，睇下點樣打劫我呀，密鑼緊鼓商量唔畀我知添，（有預拎幾多錢出來？）佢哋有分數嘅，唔會過籠。」
（點新聞特約記者陳惠芳報道）
相關報道：
