拍喜劇經歷喜怒哀樂　王丹妮忍笑最難

【點新聞報道】首次拍賀歲片《臨時決鬥》的王丹妮，除了有動作戲外還要苦練「忍笑功」，以配合賀歲喜劇片氣氛。

Louise（王丹妮）稱自己是戲中最容易笑的人，她不好意思的說：「我承認拍攝過程中最忍唔到笑。我之前冇拍過喜劇，所以對我嚟講都好新鮮，原來都係一個挑戰，要忍笑真係唔容易，不過後來俾我搵到個『蹺妙』，喺現場拍攝前同Rehearsal嘅時候都會笑咗先！一於笑飽佢，到正式拍攝嘅時候就盡力忍笑，enjoy個moment感受。」

提到為拳擊戲份努力練拳可曾受傷？Louise說：「我真係初學者，由基本動作開始學，有少少難度，但都算學得快，平時同教練切磋，不時加緊練習。加埋鏡頭配合，感覺都幾流暢，絕對交到功課㗎！當然同娜姐對打始終有難度，我唔係好有對打經驗，所以要記住每一個step，唔可以記錯，否則要從頭嚟過，甚至會可能唔小心互相弄傷。」

雖然電影短短過多月便完成，但Louise亦分享了拍攝過程的喜怒哀樂事。她回味的說：「『喜』，我覺得拍戲一齊去度笑料，令到件事有趣，好好玩；『怒』就係打拳嘅時候，有時被打中咗幾拳，就會怒火開始出現，這樣好幫到入戲；『哀』就睇住我教練高秋（胡子彤）俾人打覺得好慘；『樂』就一定未Roll機之前，大家會嗌啲宵夜傾吓偈、講吓笑，呢啲moment對於演員嚟講，係好開心嘅美好回憶。」

（點新聞特約記者陳惠芳報道）