港人移英大呻生活壓抑　大讚香港生活係天堂

【點新聞報道】正所謂「沒比較就沒傷害」，早前就有移英港人大呻，移民後搵到一間工廠工作，人工只有當地最低工資12磅，慨嘆現在才深深體會到「香港生活其實真係天堂」，不但人工高，且工作壓力小，他更形容「喺香港消費係10分開心」。

該名移英港人在連登討論區以「窮L移英有感」為題發文，大呻移民英國後生活大不如前，指「一向都有聽人講喺香港生活其實真係天堂，以往我都好贊成的，始終自己人工唔錯，仲要工作壓力小，喺香港消費係10分開心。而家身處英國嘅，我唔單止係明白咁簡單，直程係深深體會到」。

樓主在英國搵到一份工廠工作，人工只有當地最低工資12磅，「當我喺工廠執貨，攞住嘅每一件衫，購買嘅人應該好多時都係喺倫敦呢啲高消費地區嘅富人，望住個價錢牌，幾百磅一件，而自己收緊最低工資12磅都唔夠」。

他慨嘆移英後生活水平下降，「其實嗰個反差真係幾誇張，收緊幾萬蚊人工，去食幾百蚊嘅自助餐都唔會點考慮，去日本旅行又唔覺得貴，最誇張嘅其實就係喺淘寶消費。」

樓主亦提到當地工作環境的壓抑，「不斷重覆做啲小學生都識做嘅野，我宜家做野嗰度手機等物品又唔可以跟身，要鎖喺locker；而上司又真係keep住同你計KPI，要你做快啲；食飯又得半個鐘，仲要無薪」。令樓主不禁回想起在港工作的時光，「我之前喺香港又好彩可以冇壓力、好舒服咁返工，成日都可以玩手機，可以做做吓搵同事吹水，工作本身又有少少滿足感」。

帖文引起網民熱議，有人認為是樓主不自量力，「返得工廠做就預咗冇好生活啦」、「見人移英你又移，冇咁大個頭就咪戴咁大頂帽啦」、「冇錢冇技術既只係去做難民，唔係移民」、「收最低工資去邊都係咁㗎啦」。