筆是機場｜無理干預「35+顛覆案」　強烈譴責「外國勢力的強烈譴責」

文/稀思路

上回提到（前兩、三日），「35+顛覆政權案」終於判刑，45名被告，人人有份，當中首腦戴耀廷被判囚10年，有人認為合適，但亦有唔少人認為判得太少，應該判戴耀廷20年、30年，黃之鋒應該最少要判15年。一如以往，有關香港國安法嘅案件審判同判刑，梗係外國勢力出嚟刷存在感嘅時候啦，美國、英國、歐盟以至澳洲都相繼出聲，其中美國國務院發言人，更加話要「強烈譴責」判刑，筆者想講，應該係我哋強烈譴責「外國勢力嘅強烈譴責」先啱，法庭就維護國家安全案件依法判刑，唔該唔好干預我哋！

睇新聞，美國、英國以至澳洲等外國勢力干預「35+顛覆政權案」，語氣最重嘅應該就係美國，但美國講嘅嘢合唔合理呢？唔合理！例如佢話被告係參與受《基本法》保護嘅政治活動，其實美國清唔清楚《基本法》？《基本法》當然有保障自由、種種權利嘅條文，但《基本法》第23條，應該話已經進行本地立法嘅《基本法》第23條，講明要維護國家安全！美國呢種用自由做擋箭牌嘅作風，真係同香港嘅攬炒派一脈相承。

至於英國，就將被告們當係「政治異見」，當然都係錯啦！一眾被告，唔係因為政治上有唔同意見或「異見」所以被告、被定罪同被判囚，而係佢哋有實質行動，想合謀透過選舉去否決財政預算案，最終令特首下台同政府停擺，呢種行為超出咗「政治異見」，亦唔係受《基本法》保護嘅政治活動，英、美將被告行為講到輕描淡寫，但事實係被告們就係想「攬炒」香港。

之前，美國就出現過國會山莊暴亂，其中一位被告，即係「驕傲男孩」（Proud Boys）前領袖塔里奧，雖然當日根本冇現身喺首都華盛頓，但就因為觸犯煽動陰謀罪、策劃推翻政府等多項控罪，被判監禁22年；22年係咩概念，即係戴耀廷依家嘅刑期加一倍，都不如塔里奧嘅刑期咁長，如果美國嘅「道理」係通嘅，咁我哋係咪要問煽動謀反嘅美國被告，只係參與政治活動，再要譴責返美國政府？

類似嘅道理，之前英國多個地方出現暴亂，至少幾百人被起訴，當中有部分係因為喺網上煽動而被捕，而英國當時首相更要求法庭加快審理案件，係咪英國嘅法律都有保障自由呢？一啲因煽動而被捕嘅人，係咪因為「政治異見」而被捕呀？講真，美國、英國以至香港都係行普通法制，如果某啲行為喺外國會重判，一啲煽動、顛覆行為喺香港又要放生，咁似乎先係唔合理喎。

筆者仲睇到，英國喺回應「35+顛覆政權案」時，仲提到《公民與政治權利國際公約》，但《公約》明顯又被英國扭曲，《公約》有保障自由嘅條款，但同時講明如果因為國家、公共秩序安全，自由就會受到限制。即使喺西方嘅理論，權利都唔會冇限制，但偏偏依家英美等外國勢力要支持攬炒派被告，就無理地將自由無限地放大。

其實講到國安法，美國、英國等國家嘅國家安全法律，辣嘅程度完全甚於香港，至少有20條相關法律嘅美國，叛國罪可以判死刑；而英國嘅叛逆重罪法，最高刑罰係終身流徙。讀者們再睇下今次戴耀廷，明明係搞顛覆嘅首要分子，都只係判十年，仲輕過美國嘅「驕傲男孩」。今次法庭處理「35+顛覆政權案」，依法、依程序地適當判刑，過程亦公開透明，相比起英國嘅「快速審訊」，香港比普通法來源地英國，更文明、更重視法治。